Ako zběrka źiwadłowych zwucowanjow a kusow w dolnoserbskej rěcy jo wujšeł zešywk „Graj sobu!”. Ten nowy produkt Rěcnego centruma WITAJ wopśimjejo pěś źiwadłowych zwucowanjow, sedym kusow z małymi słownickami a boki za wósobinske noticki. Wón dej słužyś ako lažko pśistupny dodatny material za wucbu serbšćiny, pśedewšym w sekundarnem schójźeńku.

Krotše a wobšyrnjejše kuse se póśěguju na tšojenja a figury ze serbskich powěsćow a póchadaju z pjera Jěwy-Marje Čornakec, Jadwigi Kaulfürstoweje, Michaela Meyera a Jill-Francis Ketlicojc. Z pomocu pedagogiskego fachnika mógu źiśi a młodostne mjazy źaseś a wósymnasćo lětami se pśiswójś źiwadłowe rutiny a kuse. Zešywk se pórucyjo w A4-formaśe a jo ze špiralami wězany, tak až zmóžnijo pśirucne wužywanje a lažke kopěrowanje bokow.

Material móžo se skazaś direktnje w Rěcnem centrumje WITAJ w Chóśebuzu.