Lětosna šula w zelenem jo se wótměła w dwěma pśeśěgoma wót 9. až do 13. septembra 2024 w młodowni w Bórkowach. Wobźěliło jo se dogromady 104 wuknicow a wuknikow z 8 šulow (Tšupc, Picnjo, Janšojce, Brjazyna, Žylow a a zakładne šule R. Hildebrandt, A. Lindgren a UNESCO projektowa šula z Chóśebuza). Na pomocy stojali jim sobuźěłaśerje Rěcnego centruma WITAJ, praktikant wót Dolnoserbskego gymnaziuma a 10 ceptaŕkow. Ako zwucone jo se šula w zelenem zachopiła z rěcnymi zaběrami a nawuknjenim spiwa “Wen, wen, wen do pśirody”. Pón su slědowali źěłaŕnicki (rejowanje, spiwanje a šula něga) a na drugich dnjach pśedstajenje serbskich instrumentow, kwis wó Błotach a pśezpólne graśe. Tenraz jo nas mały śěg (Rumpelguste) dowjadł na Lědy, źož źiśi su w muzeju pód gołym njebjom wjele zgónili wó pśeźěłanju lana, su mógali wopytaś swóje twaŕske zamóžnosći pśi twarjenju bolanego chromcyka a su se wopoznali z bydlenim w domje z groźu pód jadnym kšywom. Zespominajucy móžomy groniś, až to jo był zasej wuspěšny projekt. Až do pśiducego lěta!