Lětosny Witaj-camp jo se pśewjadł wót 18. až do 23. julija w Jarješku z 29 wobźělnikami w starstwje wót 6 až do 16 lět.  Něglědajucy na rozdźělne starstwo jo mjazy wobźělnikami nastała zgromadnosć, kótaraž jo zmóžniła planowane a teke spontane zarědowanja a zaběry wuspěšnje a teke z wjaselim pśewjasć. Sportowy swěźeń, wandrowanje pśez gólu, wulěty do Budyšyna, Mužakowa a šokoladoweje manufaktury Felicitas su byli jano někotare wjeraški lěgwa. Rejowanje a spiwanje, spódobne wjacory pśi wognišću, plańtśanje w baseńku a nocne wandrowanje su byli zaběry, pśi kótarychž su źiśi a młodostne měli swój lěśojski špos. Ale nic jano rozwjaselenje jo stojało na programje. Jo sło pśedewšym wó to, aby wobźělniki mógali serbsku rěc zwenka šule nałožowaś, znate słowa wóspjetowaś a nowe nawuknuś. My smy se procowali ten cil mjazy drugim z rěcnymi graśami a nadawkami dojśpiś. Wušej togo su wobźělniki pśigótowali pisany program w serbskej rěcy a jen k wobzamknjenju Witaj-campa starjejšym pokazali.