Pśebywanje w Dolnoserbskem internaśe zmóžnja wuknikam, serbšćinu w pśirodnem rěcnem rumje ako wobchadnu rěc dožywiś a wótpowědujucy jich indiwidualnemu rěcnemu niwowoju ceło praktiski we wšednem žywjenju nałožowaś – zgromadnje z młodostnymi samskego starstwa pśi wótwardowanju z boka serbskorěcnych wótkubłarjow. Pśi tom mógu wudopołnjaś swóje rěcne zamóžnosći a teke dalej wuwijaś swóju serbsku identitu.

Mimo zgromadnego wobstaranja domacnych nadawkow powěda se serbski pótakem teke pśi warjenju, grajkanju, sportowanju, baslenju atd. Wósebnu gódnotu ma to za źiśi bźez serbskorěcneje familioweje slězyny, dokulaž mógu ju we wólnem casu wuknuś.
W Rěcnem centrumje WITAJ pśistajony team wótkubłarjow organizěrujo pśidatnje ze wšakimi partnarjami projekty we wólnem casu. Bźez internatnego městna młogim njetudejšym serbskim młodostnym njeby było móžno, póbitowanja zjawnych serbskich institucijow w měsće zawupytnuś, je zeznaś a towarišnostne žywjenje Serbow sobu dožywiś.

• Póžedanje na internatne městno