Nowy wučbny plan za šulske lěto 2010/11
Kaž kóždolětnje je Domowina – Rěčny centrum WITAJ w dobrym zhromadnym dźěle ze šulskej praksu tež za nowe šulske lěto wučbny material za Hornju a Delnju Łužicu wuwił. Do lětneho plana wotrjada wuwiwanje rěče/pedagogika přiwzachu so cyłkownje 31 titulow. Z nich předleža hač do spočatka noweho šulskeho lěta 26 titulow, dalše 4 titule maja hač do kónca lěta wuńć a jedyn titul přesunje so dla njepředwidźomneho wulkeho dźěłoweho pensuma do lěta 2011. wjace ...
Poradźowanske rozmołwy za staršich
Za staršich, kotřiž sej za swoje dźěći serbskorěčne kubłanje přeja, poskićuje Rěčny centrum WITAJ w Budyšinje poradźowanske rozmołwy – a to w Serbskej kulturnej informaciji na Póštowym naměsće 2: stajnje wot póndźele do pjatka wot 10:00 do 15:00 hodź., štwórtk hač do 17:00 hodźin kaž tež po dorěčenju. Abo wobroćće so na nas telefonisce pod čisłom 03591 / 550 400.
Nowe wudaće informaciskeho zešiwka Lutki wušło
Kónc junija je druhe čisło Lutkow za 2010 wušło. Hłowna tema tutoho wudaća su serbska narodna drasta a drastowe regiony. Nimo pisanych fotow a wumolowankow za dźěći namakaja němskorěčni starši słowničk kaž tež pokiwy k poradźowanskim časam Rěčneho centruma WITAJ. Zajimawej za staršej stej tež přinoškaj wo rěčnych rozdźělach hornjo- a delnjoserbšćiny a wo statistice wuwića WITAJ-skupin. Kubłarki namakaja we wosebitym dźělu metodiske doporučenja k wuwiću serbskeje identity kaž tež stawizničce za masažu a fantazijowe pućowanje z paslenskej předłohu. wjace ...
Dalekubłanje za kubłarki z mjezynarodnje připóznatej fachowču
Rěčny centrum WITAJ je 22. junija 2010 přewjedło
dalekubłanje za kubłarki z knj. Christine Le Pape Racine ze Šwicy, kotraž rěčeše k temje: Vom Erwerb der sorbischen Sprache bis zur Mehrsprachigkeit. Einführung ins Thema – Erfahrungsaustausch – Perspektiven für das alltägliche Handeln.
44. centralna olympiada serbskeje rěče 2010
44. centralna olympiada serbskeje rěče wotmě so wot 26. do 28. meje 2010 w młodowni w Błótowskich Bórkowach. 63 šulerjow wubědźowachu so wo požadane certifikaty a myta. wjace ...
10-lětny jubilej w Slepom
Šulerjo Zakładneje šule Slepo zaběrachu so składnostnje 10-lětneho jubileja zawjedźenja dwurěčneho projekta 2plus na swojej šuli w projektowym tydźenju ze serbskimi bajemi. Z podpěru ... wjace ...
Intensiwny kurs čěšćiny
Wot 2. do 7. awgusta zarjaduje Rěčny centrum WITAJ w Chrósćicach intensiwny kurs čěšćiny za Serbow. Wuwučować budźe wšědnje šěsć hodźin Čech Pavel Šlechta. Po popołdnjach budu so přednoški w čěšćinje poskićować a po wječorach wšelake zabawy w čěskej rěči. Planowany je tež połdnjowski wulět do Čěskeje. Wšitcy zajimcy njech so přizjewja w Rěčnym centrumje WITAJ.
W Praze přednošowała
Sobudźěłaćerka RCW, Jadwiga Kaulfürstowa, je wutoru, 4. meje 2010, na Ekonomiskej wysokej šuli w Praze čěskim studentam kulturneho managementa wo aktualnym połoženju Serbow přednošowała. Při tym złožowaše so wosebje na serbskorěčne kubłanje w pěstowarnjach a šulach.
4. serbska čitanska nóc
Pjatk, 4. junija 2010, přewjedźe Rěčny centrum WITAJ zhromadnje z Němsko-Serbskim ludowym dźiwadłom za šulerjow 4. lětnika w Dźiwadle na Hrodźe 4. serbsku
čitansku nóc. Tuta zahaji so w 19 hodź. z wjedźenjom po domje. Po zhromadnej wječeri dožiwja šulerjo zabawne čitanja z překwapjenkami. Wězo smě so kóždy tež sam w čitanju pospytać a swoju najlubšu knihu předstajić. Nóc zakónči so sobotu, 5. junija, po snědani. Přizjewće so prošu telefonisce hač do 20.05.2010 pola Michaele Hrjehorjoweje (tel. 03591 550414).
Comicowe wubědźowanje w Hornjej Łužicy
Wšitcy šulerjo mjez 10 a 18 lět su namołwjeni, so na
comicowym wubědźowanju wobdźělić. Swójskim rysowankam měli so serbske teksty přidać. Termin wotedaća je 20. meja 2010.
wjace ...
Znowa kursy čěšćiny
Štó z dorostłych chce čěšćinu wuknyć abo so w čěšćinje dale wukmanjeć? Wonkowne ministerstwo Čěskeje republiki je Domowinje za šulske lěto 2010/11 znowa přilubiło zasadźenje čěskeho wučerja w Serbach. Je planowane, zo zarjaduja so zaso
wječorne kursy za dorosćenych. Zajimcy njech přizjewja so prošu w Rěčnym centrumje WITAJ.
Lektorki po puću w šulach
Lektorki Rěčneho centruma WITAJ wopytachu w aprylu serbske šule we Worklecach, Budyšinje, Pančicach, Radworju a Bukecach. Woni informowachu wučerjow/-ki wo nowych wučbnicach a wučbnych materialijach, kiž lětsa k nowemu šulskemu lětu wuńdu, a wotmołwjachu na konkretne prašenja. Dale poradźowachu woni přitomnych/-e direktorow/-ki při wupjelnjenju skazanskich lisćinow za nowy wučbny material.
W mjezsobnej rozmołwje so zwěsći, zo słuži tajki wopyt k dobrej wuměnje nazhonjenjow. Zdobom wabichu lektorki přitomnych pedagogow za aktiwne sobudźěło při nadźěłanju dalšeho wučbneho materiala.
Dźiwadłowa pěstowarnja
Hdyž dorosćeni njedźelu, 18. apryla 2010, na wulkim jewišću NSLDź inscenaciju "Štožkuli chceće" dožiwichu, móžachu sej dźěći w samsnym času w Dźiwadle na hrodźe darmotnje klankodźiwadłowe předstajenje "Bajkowy rub" wobhladać. Wo małych wopytowarjow starachu so sobudźěłaćerki Rěčneho centruma WITAJ. Po zabawje wróći so skupinka dźěći zhromadnje do hłowneho domu.
wjace ...
Čitanske wubědźowanje
Pod hesłom „Knihi su zastupny lisćik do raja fantazije“ zarjadowaše Rěčny centrum WITAJ lětsa hižo k 6. razej čtanske wubědźowanje za šulerjow 3. lětnika. 18 najlěpšich čitarjow ze wšěch serbskich šulow wubědźowaše so sobotu, 17. apryla 2010, w dwěmaj rěčnymaj skupinomaj w Smolerjec kniharni. Zaměr wubědźowanja je, zo zeznaja šulerjo hižo sčasom bohatosć a rjanosć serbskeje dźěćaceje literatury. wjace ...
Serbskorěčne kubłarki pytane
Zo by so serbskorěčne kubłanje w pěstowarni zaručić a rozšěrić móhło, pytaja so nuznje maćernorěčne serbske kubłarki a kubłarjo. Za wotpowědne wupisanja smy wutworili nowu rubriku Wupisanja dźěłowych městnow.
Dalekubłanje za kubłarki
Rěčny centrum WITAJ přeprosy sej 13.03.2010 serbske kubłarki do Kulowskeho dźěćaceho dnjoweho přebywanišća w nošerstwje Křesćansko-socialneho kubłanskeho skutka na dalekubłanje k temje „Kotre naprawy hodźeli so derje za zwěsćenje serbskorěčnych kmanosćow dźěći wužiwać?“ Přeprošenje bě 12 kubłarkow ze sydom pěstowarnjow sćěhowało.
wjace ...
Zakładny kurs serbšćiny za staršich
Na Serbskej zakładnej šuli „Šula Ćišinskeho“ w Pančicach-Kukowje zahajištej so w měrcu zakładnej kursaj serbšćiny za staršich, kotrychž dźěći so po dwurěčnym šulskim koncepće 2plus wuwučuja. Wonej matej němskorěčnym staršim a dalšim zajimcam zakłady w serbskej rěči posrědkować. Zarjadowar kursa je Rěčny centrum WITAJ.
Nowe wudaće informaciskeho zešiwka Lutki wušło
Spočatk měrca je prěnje čisło Lutkow za 2010 wušło. Hłowna tema tutoho wudaća su serbske jutrowne nałožki. Starši zhonja tójšto zajimaweho wo pěstowanju nałožkow we wšelakich regionach, na přikład wo debjenju jutrownych jejkow, wo jutrownym spěwanju, jutrownym wohenju, jutrownej wodźe a walkowanju jejkow. Dźěći namakaja bajku wo knjeni Moškowej z mnoho rjanymi ilustracijemi k wumolowanju. Na wosebitych stronach za kubłarki poskića so nawod za hry a zaběry w jutrownym času kaž tež doporučenja k rěč spěchowacym materialijam.
wjace ...
Budyscy gymnaziasća do noweho internata zaćahnyli
Šulerjo Serbskeho gymnazija Budyšin su po zymskich prózdninach do noweho internata zaćahnyli, kotryž je w nošerstwje Rěčneho centruma WITAJ.
13.1.2010 dojednaštaj so jednaćel Křesćansko-socialneho kubłanskeho skutka (CSB), Peter Neunert, a wjednica Rěčneho centruma WITAJ, dr. Beata Brězanowa, na dalše wuske zhromadne dźěło. Po rozmołwje wjedźeše Grit Henčelowa, zamołwita za pěstowarnje pola CSB, B. Brězanowu a J. Kaulfürstowu po pěstowarnjach w Pančicach-Kukowje, Njebjelčicach, Sulšecach a Kulowje. Tam wužištej składnosć k dlěšim rozmołwam z kubłarkami. We wosom dźěćacych dnjowych přebywanišćach CSB wuknje tuchwilu na 450 dźěći serbsce.