Wosrjedź žiwjenja
Socialny team Rěčneho centruma WITAJ je wobstatk regionalnych teamow wokrjesa Budyšin. Tute nastachu 2011 na zakładźe přestrukturowanja wokrjesa Budyšin, při kotrymž buchu dotalne stołpy socialneho dźěła z dźěćimi, młodostnymi a swójbami zběhnjene. Fachowe mocy wšelakich nošerjow młodźinskeje pomocy dźěłaja nětko we wobłuku mobilneho młodźinskeho dźěła, swójbneho kubłanja, šulskosocialneho dźěła a komunalneho dźěła wobłuki přesahujo hromadźe. Woni spěchuja so přez wokrjes Budyšin.W Rěčnym centrumje WITAJ stara so sydom socialnych dźěłaćerjow wo młodych ludźi. Woni dźěłaja na serbskich wyšich šulach we Worklecach, w Budyšinje, Radworju a Ralbicach, na wyšej šuli w Slepom a su we wobłuku třoch regionalnych teamow we wokrjesu po puću. Woni nawjazuja kontakt k dźěćom, młodostnym a młodym staršim na kraju a poskićuja swoju pomoc.
Serbsku identitu namakać
Socialni dźěłaćerjo chcedźa pokazać, zo je serbska kultura tak młoda a žiwa, kaž sej ju młodostni sami sčinja. Woni chcedźa jim pomhać, swoju serbsku identitu namakać, ju přiwzać a za swójski přichod wužiwać. Młodostni wobroća pak so tež na socialnych dźěłaćerjow, hdyž maja problemy z druhimi šulerjemi, hdyž hroža špatne censury a starši móhli přesłapjeni być.
Lěpšiny na kraju wužiwać
Mnozy serbscy młodostni bydla na wsy. Tuž jězdźi mobilna młodźinska pomoc Rěčneho centruma WITAJ direktnje do wjeskow, do tamnišich młodźinskich klubow abo k samostatnym młodźinskim skupinam. Tež přez socialne syće w interneće přińdu socialni dźěłaćerjo z młodostnymi do kontakta, natwarja prěnje zwiski a poskićuja swoju pomoc. Zhromadnje z nimi dźěłaja socialni dźěłaćerjo na tym, lěpšiny na kraju wužiwać.
