Dnja 18. nowembra 2025 jo se wótměł w Rěcnem centrumje WITAJ Chóśebuz a Dolnoserbskem internaśe lětosny Serbski familijowy źeń. Su pśišli někotare serbske familije, wobydlarje Dolnoserbskego internata a dwě góleśi z jeju wótkubłaŕku z horta wětošojskeje zakładneje šule. Na zachopjeńku su pokazali dolnoserbski źiśecy film „Pomoc za nykusa“. Pó filmje stej wjednik Rěcnego centruma WITAJ Chóśebuz kněz Melcher a projektowa wobźěłaŕka Katrin Lehmannojc gósći pśiwitałej a zgromadnje su spiwali „Wjasele źinsa“. Źiśi a starjejše su mógali wjele rědnych wěcow dožywiś na wšakich stacijach. To su byli lutkowa źěłaŕnja, grajna budka, „mólowański paradiz“, serbski kwis, muzikowy rožk a „kraj powěsćow, bajkow a wulicowańkow“. Na tom zarědowanju jo kněžyła familiarna atmosfera. A rědnje jo było, až stej dwě wuknicy Dolnoserbskego gymnaziuma toś ten swěźeń pódpěrowałej.