W ramiku Serbskego familijowego dnja su wuknice a wukniki zakładneje šule „Lutki“ a źiśi ze źiśownje „Mato Rizo“ w Žylowje muzikaliski wjerašk dožywili. Za 22. september 2022 jo Rěcny centrum WITAJ organizěrował wustup ze Serbskim ludowym ansamblom Budyšyn, kótaryž jo prezentěrował program „Wót dudow až k tarakawje“. Źiśi njejsu jano mógali zajmne wěcy wó typiskich serbskich instrumentach nazgóniś, ale teke jich zuk zasłyšaś. Tak na pśikład klince małe serbske fidle, kótarež maju tśi tšuny, wjelgin milnje a jasnje. Dłymšy zuk pak maju tśitšunowe wjelike serbske fidle. Moderatorka ansambla jo rozkładowała rozdźěle mjazy jadnotliwymi dudami a wopisała natwaŕ wósrědneje měchawy. Na kóńcu teje „wósebneje muzikoweje góźiny“ jo wóna źiśi wótpšašowała, lěc su se hyšći mógali na mjenja instrumentow spomnjeś. Serbski ludowy ansambl jo mimo tradicionelnych serbskich instrumentow hyšći dalšne pśedstajił ako trumscheit a cartowe fidle. Wó tom, až toś ten koncert źiśam jo se spódobał, njejo jano wuwołanje za pśidankom znaniło, ale teke to stawne rytmiske pśiklaskanje orchesterowych kusow.
