6. čitanske wubědźowanje – Najlěpši čitarjo pochadźeja z Koćiny a Chrósćic 

Lucija Šołćic ze Serbskeje zakładneje šule Ralbicy a Paul Korjeńk ze Serbskeje zakładneje šule Chrósćicy staj dobyćerjej 6. čitanskeho wubědźowanja, kotrež wotmě so sobotu, dnja 17. apryla 2010, w Budyskej Smolerjec kniharni.
Lucija Šołćic z Koćiny wudoby sej 1. městno w skupinje serbskich maćernorěčnych šulerjow a Chróšćan Paul Korjeńk w skupinje šulerjow němskorěčneho pochada. Na wurisanju wobdźělichu so cyłkownje 19 najlěpšich čitarjow 3. lětnika serbskich zakładnych šulow.
Zaměr wubědźowanja pod motom „Knihi su zastupny lisćik do raja fantazije“, kotrež Rěčny centrum WITAJ z podpěru Ludoweho nakładnistwa Domowina a Sakskeje kubłanskeje agentury Budyšin přewjeduje, je, šulerjow hižo zahe k čitanju serbskich dźěćacych knihow wuwabić a jim scyła bohatosć literatury zbližić.
Wšitcy wobdźělnicy mějachu najprjedy publikumej z knihi tekst předčitać, kotryž su sej sami wuzwolili a doma hižo nazwučowali. Najwoblubowaniše běchu při tym knihi Jěwy-Marje Čornakec z powědančkami wo wrobliku Fridźe, myšce Pip-Pip a žabce Šlapce, ale tež knihi awtorow Beaty Nastickec, Jurja Brězana a Wórše Wićazoweje. Serbscy maćernorěčni šulerjo čitachu hišće dalši – njeznaty – tekst z knihi Angele Stachoweje „Słónčna róža Marhata“. Tež tutón nadawk wulkotnje zmištrowachu.
K pjeć wosobow ličacej jury pod nawodom nakładnistwoweje lektorki Weroniki Žuroweje słušachu wučerce Madlena Nasticcyna a Margita Nowakowa, wučerka na wuměnku Angela Langerowa a nawodnica Rěčneho centruma WITAJ dr. Beata Brězanowa. Jury pohódnoći wukony šulerjow a wuznamjeni najlěpšich čitarjow.