Zaměr: Ewaluacija ma zwěsćić wobstejnosće, pod kotrymiž so pěstowarske dźěći imersiwnje po modelu WITAJ kubłaja. Wotpowědnje wuslědkam předpołoža so namjety k optimalizowanju modela WITAJ.

Předmjet: Ewaluacija poćahuje so na pjeć wubrane WITAJ-skupiny w pěstowarnjach z hewak jednorěčnje němskimi skupinami.

Přewjedźenje: Ewaluacija wotměwa so w šěsć časowych interwalach. W tutych so dźěći a kubłarki we wšědnym mjezsobnym wobchadźe wobkedźbuja. Wuwiće serbskorěčnych zamóžnosćow dźěći přepytuje so z pomocu specializowanych testow. Z kubłarkami a nošerjemi pěstowarnjow wjedu so wobšěrne interviewy ke kubłanju po modelu WITAJ. W formje naprašnikow hromadźa so měnjenja a nahlady staršich ke kubłanju swojich dźěći. Wuslědki tutych přepytowanjow so analyzuja a zapopadnu so w detailnym spisu.

Wuslědk: Nastać ma analyza, kotraž wěnuje so mj. dr.

• swójbnym pozadkam dźěći, kotrež so na projekće WITAJ wobdźěleja
• přićinam staršich za rozsud, swoje dźěćo imersiwnje kubłać dać
• trěbnym wuměnjenjam, kotrež nošerjo tworja, zo móhli so dźěći w pěstowarni serbsce kubłać
• wuměnjenjam, pod kotrymiž kubłarki dźěćom přewažnje bjez serbskorěčnych předznajomosćow serbšćinu zbliža
• informowanosći staršich, nošerjow a wjednicow pěstowarnjow wo imersiwnym kubłanju
• wuwiću rěčnych kmanosćow dźěći w dobje ewaluacije.