Serbšćina w powołanju

 

Podpěra młodostnym při powołanskej orientaciji

W ramiku Domowinskeho projekta "Přichod we Łužicy přez dwu- a wjacerěčnosć" poskićuje so serbskim młodostnym wot 7. lětnika pomoc w powołanskej orientaciji. Tuta wopřija

  • informacije k wšelakim powołanjam
  • pokiwy k požadanjam
  • poskitki praktikumow
  • informacije kołowokoło studija
  • pokiwy k studijnym pobytam we wukraj atd.
Nimo poskitka wšelakich materialijow přewjeduja so k tomu zarjadowanja na serbskich srjedźnych šulach kaž tež na Serbskim gymnaziju w Budyšinje. Při tym steja wosebje tajke powołanja w srjedźišću, w kotrychž je trěbne abo móžno, serbšćinu nałožować – na přikład w kubłanju, medijach, turizmje, gastronomiji, zarjadnistwje abo w rjemjeslniskich powołanjach. Zarjadowanja k powołanskej orientaciji organizuja so we wuskim zhromadnym dźěle z wukubłanišćemi, serbskimi rjemjeslnikami a předewzaćelemi, serbskimi institucijemi – mj. dr. z Rěčnym centrumom WITAJ –, ze serbskimi studentami a wukubłancami a dalšimi. Logo "Rěče su kluče" skedźbnja na zarjadowanja a wozjewjenja projekta.
 

Zarjadowanja:

"Wobhladaj sej swět, ale nawróć so!"

Pod tutym hesłom přewjedźe so 13. oktobra 2011 za šulerjow 11. a 12. lětnika Serbskeho gymnazija Budyšin cyłodnjowski projekt k powołanskej orientaciji. Šulerjo zhonichu wo móžnosćach wšelakich studijow, ... > dokumentacija

Materialije:

 

Serbterm – serbska fachowa online-terminologija

Na internetowej stronje www.serbterm.de namakaja zajimcy najwšelakoriše serbske fachowe zapřijeća po fachowych polach rozrjadowane. Hustohdy faluja němskim wurazam serbske wotpowědniki. Serbska online-terminologija skića móžnosć, spěšnje a kóždy čas za słowami pytać abo słowa sam zapisować. Wosebity system podate zapřijeća hódnoći a tak přiwza abo wotpokaza. Kóždy móže so na SerbTerm wobdźělić a k rozšěrjenju serbskeho słowoskłada přinošować.

 

Poskitki Euroregiona Neiße-Nisa-Nysa

KOMPETENT4

Wobydlerjam w Euroregionje Neiße-Nisa-Nysa – Čecham, Polakam, Němcam a Serbam – skića so přez hranicy přesahowace hospodarske a dźěłowe wiki wosebite móžnosće a perspektiwy. Zo bychu so tute zaměrnišo wužiwać a wuwiwać hodźeli, wuwichu partnerojo kubłanskeje syće Pontes poskitk KOMPETENT4. Po tutym móža so wobdźělnicy w pjeć wšelakich modulach kwalifikować. Wosebity gremij wotpowědne kmanosće certifikuje. Detailniše informacije namakaće tu.