W zašłych lětach bě Rěčnemu centrumej WITAJ móžno, w lěćnych prózdninach serbskich maćernorěčnych šulerjow, wukubłancow a studentow do pěstowarnjow słać, zo bychu serbšćinu wuknjacym dźěćom nimo kubłarki přidatny serbskorěčny partner byli. Poskitk serbskorěčnych pomocnikow dóstawaja w prěnim rjedźe pěstowarnje z jednej abo dwěmaj WITAJ-skupinomaj, přewažnje w kónčinach, hdźež serbšćina wšědny dźeń hižo tak prezentna njeje. Runje w dowolowym času su tute kubłanišća dźakowne za kóždužkuli pomoc, wosebje w času, hdyž je serbska kubłarka w dowolu a njeje dalšeje koleginy, kiž by serbskorěčne kubłanje w skupinje zaručić móhła.

Młodźi prózdninscy pomocnicy wěnuja so w prěnim rjedźe serbskej komunikaciji z dźěćimi, kiž chcedźa tutu rěč nawuknyć. Woni sej z nimi hraja, wobhladuja sej z jednotliwcami dźěćace knižki atd. – při tym stajnje wjele rěčo.

Rěčny centrum WITAJ tutu rěč spěchowansku naprawu we wothłosowanju z pěstowarnjemi a jich nošerjemi koordinuje a financuje.

Poskitk za prózdninske dźěła w lěće 2011

W lěćnych prózdninach 2011 dźěłaše cyłkownje wosom prózdninskich pomocnikow w sćěhowacych pěstowarnjach:

• Budyšin "Pjerachowy kraj": 11.7.–22.7.2011
• Bukecy "Słónčny kućik": 8.8.–19.8.2011
• Čorny Chołmc "Krabat": 11.7.–22.7.2011
• Ćisk "Dom lutkow": 18.7.–29.7.2011
• Nowe Město "Skopčk": 11.7.–22.7.2011
• Radwor "Marja Kubašec": 18.7.–29.7.2011
• Rakecy "Kraj palčikow": 18.–29.7.2011
• Rowno "Milenka": 18.–29.7.2011