Swójbny dźeń - HŁ

Junij 2011: Měšćanska rallye po Kulowje

Něhdźe 30 wćipnych wulkich, małych a najmjeńšich sćěhowaše na dnju Božeho spěća, 2. junija 2011, přeprošenju Rěčneho centruma WITAJ na swójbne popołdnjo a poda so na měšćansku rallye po Kulowje. Při tym wuslědźichu wobdźělnicy z Horow, Budyšina, Róžanta a samo domoródni wšelake zajimawostki města. Po hodźinskim pućowanju zetkachu so wšitcy na hrajkanišću katolskeho dźěćaceho domu „Jakubetzstift“. Tam wužichu starši při zhromadnej swačinje składnosć k rozmołwje a wuměnje nazhonjenjow. Nasta žiwa diskusija mjez staršimi, sobudźěłaćerkomaj a nawodnicu RCW kaž tež kubłarkomaj tamnišeje pěstowarnje wo dwurěčnym kubłanju. Po swačinje a wuhódnoćenju rallye wobhladachu sej starši pěstowarnju mjez tym zo so dźěći na hrajkanišću zabawjachu, paslachu a so šminkować dachu.

Rezimej młodeje maćerje z Kulowa: „Sym dźensa tójšto zajimaweho wo našim měsće zhoniła a detaile na wědomje brała, kiž wšědny dźeń prosće přewidźu. Dwurěčnu atmosferu na tute wašnje dožiwić, bě za mnje a za moje dźěći wulkotne nazhonjenje. Mi je zarjadowanje zdobom pohon, so w přichodźe hišće intensiwnišo wo dwurěčne kubłanje dźěći prócować.“

 01_swojbny_dzen_Kulow_201102_swojbny_dzen_Kulow_201103_swojbny_dzen_Kulow_201104_swojbny_dzen_Kulow_201105_swojbny_dzen_Kulow_201106_swojbny_dzen_Kulow_201107_swojbny_dzen_Kulow_201108_swojbny_dzen_Kulow_201109_swojbny_dzen_Kulow_201110_swojbny_dzen_Kulow_201111_swojbny_dzen_Kulow_201112_swojbny_dzen_Kulow_201113_swojbny_dzen_Kulow_201114_swojbny_dzen_Kulow_201115_swojbny_dzen_Kulow_201116_swojbny_dzen_Kulow_201117_swojbny_dzen_Kulow_201118_swojbny_dzen_Kulow_201119_swojbny_dzen_Kulow_201120_swojbny_dzen_Kulow_201121_swojbny_dzen_Kulow_201122_swojbny_dzen_Kulow_201123_swojbny_dzen_Kulow_201124_swojbny_dzen_Kulow_201125_swojbny_dzen_Kulow_201127_swojbny_dzen_Kulow_201128_swojbny_dzen_Kulow_201129_swojbny_dzen_Kulow_201130_swojbny_dzen_Kulow_201131_swojbny_dzen_Kulow_201132_swojbny_dzen_Kulow_201133_swojbny_dzen_Kulow_201134_swojbny_dzen_Kulow_201135_swojbny_dzen_Kulow_201136_swojbny_dzen_Kulow_201137_swojbny_dzen_Kulow_2011


Nowember 2010: Klankodźiwadło "Pintlašk" a serbske kino "Gilles" w Budyšinje

Něhdźe 70 zajimcow sćěhowaše 17.11.2010 přeprošenju Rěčneho centruma WITAJ na swójbne popołdnjo do Serbskeho domu. Mjeztym, zo zabawajachu so najmłódši ze swojimi staršimi na klankodźiwadłowym předstajenju, wobhladachu sej něhdźe 25 šulskich dźěći a starši zajimawe serbskorěčne kinowe předstajenje „Gilles“.
Při šalce kofeja wuměnichu sej starši swoje nazhonjenja w dwurěčnym kubłanju. Dźěći napaslichu sej w tutym času swójske připinaki.
Po tym wjedźeše klankar Měrćin Krawc wopytowarjow přez wustajeńcu, kotraž pokaza so składnostnje jeho 50-lětneho jewišćoweho jubileja w Serbskej kulturnej informaciji.

 

 

 


Meja 2009: Pućowanje z Budyšina podłu Sprjewje do Hrubjelčic

Dźeń Božeho spěća, 21. meje 2009, zetka so 30 zajimcow na parkowanišću při Budyskim Humboldtowym haju, zo bychu hromadźe z druhimi swójbami, kotrychž dźěći so dwurěčnje kubłaja, podłu Sprjewje do Hrubjelčic pućowali. Knjeni Marja Macalina, wobsedźerka Hrubjelčanskeho hotela, powědaše staršim wo zajimawych pozadkach idyliskeho Humboldtoweho haja a Budyskeho předměsta. W samsnym času zeznachu dźěći serbske powěsćowe postawy připołdnicu, lutki a wódneho muža. Při tym dyrbjachu samo ze zawjazanymaj wočomaj rubiško wódneho muža spóznać. Tak bě pućowanje tež za třilětnych małe dožiwjenje. So z busom z Hrubjelčic wróćiwši móžachu dźěći swoju wušiknosć při paslenju wuspytać a starši sej swoje nazhonjenja z dwurěčnym kubłanjom wuměnić.

 


Nowember 2008: Předstajenje filma „Ruudi“

Na pokutnym dnju, 19. nowembra 2008, přeprosy Rěčny centrum WITAJ wšitkich staršich ze swojimi serbsce wuknjacymi dźěćimi na swójbny swjedźeń do Budyšina. Z podpěru Sakskeho wukubłanskeho a wupruwowanskeho kanala (SAEK) předstaji so na žurli Serbskeho domu něhdźe 100 přichwatanym hosćom serbsce synchronizowany estniski dźěćacy film „Ruudi“. Na Mjezynarodnym dźěćacym a młodźinskim filmowym festiwalu „Schlingel“ bě so 2006 z publikumowym mytom mytował. Zo by so prawa kinowa atmosfera stworiła, poskićowaše so přihladowarjam popcorn a brěčka. Do a po filmje mějachu dźěći składnosć, sej swójski button zhotowić.

 


Oktober 2008: Klankodźiwadło "Dobre ranje"

Njedźelu, 12. oktobra 2008, dožiwi wjace hač 80 wopytowarjow zajimawe popołdnjo w Budyskim Dźiwadle na Hrodźe, kotrež bě Rěčny centrum WITAJ zhromadnje z Němsko-Serbskim ludowym dźiwadłom zarjadował. Wot 15 hodź. mějachu hosćo při kofeju a tykancu składnosć k rozmołwje a wuměnje swojich nazhonjenjow ze serbsko-němskim rěčnym kubłanjom swojich dźěći. Prjedy hač sej dźěći serbskorěčnu klankodźiwadłowu hru “Dobre ranje” wot Lubiny Hajduk-Veljkovićowej wobhladachu, móžachu z přirodnymi materialijemi paslić, kołkować abo tež listowe wobalki wumolować.

 

 


Juni 2007: Swjedźeń we Wojerowskim zwěrjencu

Lětuši nalětni swójbny dźeń wotmě so na dnju dźěsća we Wojerowskim zwěrjeńcu. Wjac hač tři tysac wopytowarjow sćěhowaše serbskemu programej pěstowarskich dźěći z Němcow, Hory a Ćiska, přez kotryž wjedźeše na lóštne wašnje Diana Fryčec.  Šulerjo zakładneje šule „Handrij Zejler“ a Lessingoweho gymnazija z Wojerec pokazachu tohorunja ze serbskimi rejemi a spěwami, kak serbšćinu na swojimaj šulomaj pěstuja. Wo zabawu a paslenje ze serbskimi motiwami starachu so wučency Serbskeje fachoweje šule Budyšin. Na kromje swjedźenišća zaběraštej maskotce „Witko“ a „Baba“ přihladowarjow z w dwurěčnej dźiwadłowu scenu. Za tutón přiležnosć je Jandytar Hajnk, awtor dotalnych scenow serbskeje maskotki „Witko“, dwurěčnu scenu napisał, w kotrejž rěčeše „Baba“, maskotka zwěrjeńca, w němskej rěči, mjeztym zo „Witko“ po zwučenym wašnju z dźěćimi serbowaše. 

 


Juni 2006: Wopyt wuhlowych jamow

Sobotu, dnja 10.06.2006 přeprosychu sej sobudźěłaćerki RCW wšitke swójby, kotrychž dźěći so dwurěčnje kubłaja, na wuprawu do Slepjanskeje kónčiny. Po zetkanju na dworje SKC poda so něhdźe 35 wobdźělnikow do Slepjanskeje cyrkwje. Regionalny rěčnik Domowiny, Manfred Hermaš, wjedźeše wopytowarjow po cyrkwi a powědaše k wosebitosćam krajiny a ludnosće. Po tym zesydachu so wšitcy do farskeje zahrody. Při pikniku a paslenju dźěći wuměnichu sej starši, kotřiž pochadźachu ze wšelakich kónčin, kaž na př. z Dźěwina, Budyšina, Narća, Chasowa a Horow, swoje nazhonjenja k prašenjam dwurěčneho kubłanja. Wědomostna sobudźěłaćerka RCW Anja Karichowa jim při tym wustojnje na metodiske prašenja wotmołwi. Nasyćeni podachu so wšitcy po pikniku z busom na wuhladnišćo do Wochozy. Tam postrowi jich nawoda tamnišeje wuhloweje jamy, kotryž rozkładowaše wottwar a wužiwanje brunicy. Zajimowani připosłucharjo mějachu wosebje prašenja k dalšim planam rozšěrjenja wuhlowych jamow na sobudźěłaćerja Vattenfalla, kotryž jim tute tež rozjasni. Po nawróće do Slepoho zabawjachu so dźěći na hrajkanišću Rownjanskeje pěstowarnje, mjeztym zo wopytachu starši Njepilic dwór. Tam zhonichu tójšto wo stawiznach serbskich holanskich burow a wo wliwje wudobywanja brunicy na serbsku rěč. Hačrunjež je planowane, zo so wuhlowe jamy tež Rownom dale bliža, ponowjeja tuchwilu z wulkim angažementom Njepilic dwór pod motom "Tež, hdyž bych wědźał, zo je jutře kónc swěta, bych dźensa hišće štom sadźił."