Wjesoła nahlada a hołk a tołk knježachu njedźelu popołdnju, 26. februara 2012, w Chróšćan wjacezaměrowej hali, jako so tam něhdźe 400 dźěći a staršich k swójbnej schadźowance zetka, na kotruž běchu Rěčny centrum WITAJ, župa "Michał Hórnik" a Serbski ludowy ansambl přeprosyli. W běhu zahajenskeho programa pak bě najprjedy raz dospołnje ćicho, jako předstajištej so bajce "Wjelk a sydom kózlatkow" a "Cyketarušk". Florian Kaulfürst jej baješe, jónu ze sylnym a w přichodnym wokomiku z něžnym abo drapatym hłosom. Wotpowědne jednanje – hač dešćik a hrimanje, dupot podkówow abo fifolenje ptačiny – zwobraznještaj hudźbnje rysujo Liana Bertók při klawěrje a Alexander Peter při najwšelakorišich perkusiskich instrumentach. W běhu dalšich třoch hodźin pak poskićichu so dźěćom najwšelakoriše zabawy.

 

Tak móžachu we wšelakich stacijach sportować, eksperimentować, so při rěčnych hrach wubědźować, sej wobličo pomolować dać abo sej dekoratiwne paslenki připrawić.Rěčne zamóžnosće serbskich a serbsce wuknjacych dźěći běchu tež žadane při kompjuterowych a druhich hrach rěčneho centruma abo při logopediskich zwučowanjach. Hdyž so Rěčny centrum WITAJ ze swojej dźěławosću kaž tu w Chrósćicach ze wšěmi swojimi poskitkami a materialijemi, kiž wuwiwa, prezentuje, njepobrachujetej wězo tež časopisaj Płomjo a Lutki ze swojimaj redaktoromaj.

 

Při wšěch pisanych zaběrach za dźěći wot žłobika hač k zakładnej šuli pak njezabychu zarjadowarjo na staršich. Woni móžachu so při poskićenej swačini do bjesady dać abo so poradźować dać wot rěčneje terapeutki Wandy Wokoweje, zežiwjenskeje fachowče Rafaele Wićazoweje abo tež socialneje dźěłaćerki rěčneho centruma, kotraž poskićuje swójbne kubłanje.

 

Při tajkim dobrym wothłosu móhła so swójbna schadźowanka na poslednjej njedźeli zymskich prózdnin – wospjetne přewjedźenje wězo předpokładowane – k znatemu zapřijeću a  krutemu zapiskej w serbskich protykach etablěrować.

 

 

 

---

Swójbne popołdnjo 2011