Swjedźeń serbskeje rěče za B-serbšćinarjow 2011

 Dnja 29.09.2011 wotmě so hižo k sedmemu razej swjedźeń serbskeje rěče za šulerjow 4. lětnika, kiž wuknu serbšćinu jako cuzu rěč. Twarskich naprawow w Radworskej šuli dla organizowaše so tutón projekt lětsa na Ralbičanskej zakładnej šuli. Tak dožiwi 103 šulerjow ze Slepoho, Wulkeje Dubrawy, Barta, Bošec, Bukec a Kulowa zhromadnje ze šulerjemi hosćićelskeje šule zabawne serbskorěčne dopołdnjo.

Na spočatku wubědźowachu so woni w třoch měšanych skupinach w staflowych hrach a so tak zeznajomichu. Po snědani wobdźělichu so šulerjo na dźěłarničkach. Wulki zajim wubudźichu rallye po Ralbicach, sportowe hry a rejowanska dźěłarnička z Georgijom Marinovom. Ale tež předstajenje serbskeje knihi z Beatu Nastickec, dźěłarnička młodych redaktorow Płomjenja, předstajenje Dźěćiznaka z Móniku Dyrlichowej a serbski xxl-scrabble wabjachu šulerjow do dźěła. Za hosći ze šulow, kiž maja zwjetša němskorěčny wobswět, bě jara zajimawe serbskorěčnu atmosferu Ralbičanskeje šule a wokoliny dožiwić. Za nich je to pohon, so dale w serbšćinje wukmanić. Ale tež za domoródnych bě dopołdnjo wobohaćenje, wšak zwěsći tón abo tamny: Mamy wulke lěpšiny, hdyž móžemy serbsku a němsku rěč runohódnje nałožować. 

Zastupjerka Sakskeje kubłanskeje agentury Budyšin knjeni Petra Rübesamowa, kiž bě přeprošenju RCW na swjedźeń sćěhowała, ma projekt za poradźeny a namołwi, jón tež w přichodźe dale wjesć.