|
10-lětny jubilej w Slepom Šulerjo Zakładneje šule Slepo zaběrachu so składnostnje 10-lětneho jubileja zawjedźenja dwurěčneho projekta 2plus na swojej šuli w projektowym tydźenju ze serbskimi bajemi. Z podpěru towarstwa „Njepilec dwór“ w Rownom, gmejny Slepo, Serbskeho kulturneho centruma Slepo, Serbskeho šulskeho towarstwa a Rěčneho centruma WITAJ zeznachu dźěći bajowe figury kaž lutki, připołdnicu, hadźaceho krala a wódneho muža, kotrež w zakónčacym swjedźenskim programje dnja 12. meje 2010 předstajichu. Přihladowarjo zwjeselichu so na serbskich přinoškach, kotrež wo rosćacej zahoritosći za serbsku rěč a kulturu swědča.
Prěnja serbska dźiwadłowa pěstowarnja
Njedźelu, 18. apryla 2010, zarjadowa NSLDź zhromadnje z Budyskim Rěčnym centrumom WITAJ prěni króć dźiwadłowu pěstowarnju. To rěka, zo smědźachu dźěći předstajenje klankodźiwadła dožiwić a po tym paslić a molować, mjeztym zo sej starši we wulkim domje hru „Štožkuli chceće“ wobhladachu. Dwanaće dźěći w starobje třoch do dźewjeć lět je poskitk přiwzało.
Mali hosćo słuchachu na wšelake bajki, kotrež jim tři žony na přazy powědachu. We wuběrnej a zrozumliwej serbšćinje předźechu dźiwadźelnicy jednu bajku po druhej do wulkeho pisaneho ruba, hrajo při tym z klankami. Na scenach a mjez nimi zaklinčachu lóštne spěwy.
Tři žony předźechu swoje bajki cyły čas sedźo na skromnje zarjadowanym jewišću, tak zo so publikum cyle na jich powědanje a na hru klankow koncentrowaše.
Projekt wo Serbach na Kamjenskej šuli  Na Kamjenskej zakładnej šuli Sophie Scholl w Brězni zaběrachu so šulerjo wšěch štyrjoch lětnikow w cyłotydźenskim projekće ze Serbami. 06.01.2010 zeznachu woni pod nawodom dweju sobudźěłaćerkow Rěčneho centruma WITAJ serbske drasty a nazwučowachu sej serbsku reju. Nimo toho rozestajachu so ze serbskej dźěćacej literaturu a nadźěłachu sej mały słowničk. Tež wučerce Worklečanskeje zakładneje šule so na šulskim projekće wobdźělištej. Wonej předstajištej dźěćom mjez druhim serbske nałožki a powěšćowe postawy.Projekt w horće Wojerowskeje šule "Handrij Zejler" Dnja 20. februara 2009 wopytachu sobudźěłaćerki Rěčneho centruma WITAJ hortowe dźěći Wojerowskeje zakładneje šule „Handrij Zejler“, zo bychu jim serbskorěčny projekt poskićili. Při štyrjoch stacijach móžachu so wšitke hortowe dźěći na wšelake wašnje ze serbskimi temami zaběrać. Tak rejowachu na přikład „Šewca“ a „Cyp, cyp, cybolinku“, zestajichu a wuhotowachu sej serbski kapsny słowničk, zhotowichu sej čitanske znamješka a přitykowaki ze serbskimi motiwami a hrajachu wjacerěčnu hru „Pytanje pokłada“. Tež hdyž mějachu jenož někotři předznajomosće w serbšćinje, přiwzachu wšitke dźěći poskitki z widźomnym zajimom a wjeselom. Dźěći kaž tež kubłarki so z rjanej paslenku pola sobudźěłaćerkow Rěčneho centruma WITAJ podźakowachu. Projekty tajkeho razu polěkuja dobrej mjezsobnej atmosferje mjez serbskimi a němskimi dźěćimi w kubłanišću.
Swjedźeń kulturow w Budyskim horće Na zakónčacym zarjadowanju hortowskich dźěći 6. zakładneje šule Budyšin zaběrachu so dnja 7. julija 2008 něhdźe 120 zajimowanych šulerjow prěnjeho do štwórteho lětnika z wosebitosćemi wšelakich kulturow. Mjez druhim wočakowaše jich w młodźinskim clubje MAX w Strowotnej studni tež serbski poskitk, kotryž nawjedowachu sobudźěłaćerki Rěčneho centruma WITAJ. Tak zeznachu dźěći serbsku narodnu drastu, nazwučowachu serbske dźěćace reje a nadźěłachu sej swójski wobrazowy słowničk w serbskej rěči. Kubłanska komisija z Ostravy we Łužicy Fachowcy šulskeje komisije z Ostravy pod nawodom Pětra Kalety, wědomostneho sobudźěłaćerja na Masarykowym instituće Praskeje akademije wědomosćow, zeznajomichu so wot 17. do 19. junija 2008 z kubłanskim systemom w Němskej. Woni wopytachu mjez druhim Serbski gymnazij w Budyšinje a CSB-pěstowarnju w Pančicach-Kukowje. Sobudźěłaćerjo šulskeho zarjada z Čěskeje zajimowachu so wosebje za metody dwurěčneho kubłanja a organizaciju cyłodnjowskich poskitkow. Wopytowarjam skićeše so wobšěrny program, kotryž wobsahowaše mjez druhim wjedźenje po Budyšinje a Serbskim muzeju, wopyt proby šulerskeje dźiwadłoweje skupiny w Dźiwadle na hrodźe, dohlad do muzeja Ćišinskeho a předstajenje serbskich wučbnicow a wučbnych materialijow w RCW kaž tež serbskeje literatury w Smolerjec kniharni. We wječornej rozmołwje ze zastupjerjemi młodźinskeho towarstwa PAWK, wjesneho folklorneho ansambla Wudwor, serbskimi gymnaziastami a dalšimi młodostnymi zhonichu zajimowani čłonojo komisije tójšto wo organizowanju swobodneho časa a angažementa za serbskich dźěći a młodostnych. "Europski tydźeń" w Žitawje
Lessingowa zakładna šula w Žitawje je přewjedła za swojich 300 šulerjow wot 1. do 4. lětnika wot 7. do 11. apryla 2008 "Europski tydźeń". Šulerjo zaběrachu so z wosebitosćemi krajow a narodnosćow europskeje unije, mjez druhim tež ze Serbami. Sobudźěłaćerka Rěčneho centruma WITAJ Silwija Wjeńcyna šulerjam na třoch dnjach Serbow předstaji. Tak zhonichu tójšto wo serbskej rěči a kulturje, wo nałožkach, tradicijach a narodnych drastach Serbow. Hladajo na to, zo wobdźěleja so wšitcy šulerjo na wučbje čěšćiny, nazhonichu woni bliskosć wobeju słowjanskeju rěčow. |
|
|