Hižo k dźesatemu  razej bě Rěčny centrum WITAJ šulerjow 3. a 4. lětnika na zhromadny prózdninski tydźeń přeprosył. Spěšnje so dźěći wšelakich šulow mjezsobu spřećelichu. Do programa campa słušacha wopyt Dźěćaceje a młodźinskeje farmy we Wojerecach, wobhladanje Budyskeho dźiwadła, wopyt Röhrscheidtoweje kupjele w Budyšinje kaž tež sawrijoweho parka w Małym Wjelkowje.

 

Wjeršk tydźenja bě nazwučowanje swójskeho dźiwadła a skónčnje předstajenje tutoho před dźěćimi WITAJ-skupiny Myšečanskeje pěstowarnje.

 

Přespěšnje minychu so dny. Mučni ale zbožowni zapakowachu dźěći pjatk dopołdnja nimo swojich mazanych drastow tež rjane dopomnjenki na zhromadne dožiwjenja do swojich wačokow – tón jedyn abo tamny tež adresu z přećom na bórzomne zasowidźenje.