Ralbičenjo wospjet dobyli

Štwórtk, dnja 13. oktobra 2011, wubědźowachu so zaso najlěpše běharki a běharjo serbskich srjedźnych šulow a serbskeho gymnazija w Ralbičanskim stadionje wo staflowy pokal Płomjenja. Při najrjeńšim słónčnym wjedrje wojowachu šulerjo mjeztym hižo k 28. razej wo požadanu sportowu trofeju. Tež lětsa zaso měješe Ralbičanske prěnje mustwo nós prědku, tež hdyž jenož z někotrymi sekundami předskokom. Dalše městna wobsadźichu: Serbski gymnazij Budyšin, SSŠ Budyšin, SŠ Kulow, SSŠ Worklecy a Ralbičan druhe mustwo (bjez hódnočenja).

Po mytowanju předstaji Florian Kaulfürst wobdźělnikam sportowanje z małym bulikom, footbag mjenowany. Wězo smědźachu so šulerjo tež sami jónu wuspytać.

Redakcija Płomjenja dźakuje so Brězanec pjekarni z Rakec a Weclichec předawarni napojow ze Sernjan za sponsorowanje całtow a pića. Dalši dźak słuša wučerjam Ralbičan šule za pomoc a podpěru při přewjedźenju zarjadowanja.