Centralna olympiada serbskeje rěče

Kóždolětnje zetkawaja so najlěpši šulerjo-serbšćinarjo z Delnjeje, srjedźneje a Hornjeje Łužicy k wubědźowanju w serbskej rěči.

Šulerjo buchu swojim serbskorěčnym kmanosćam wotpowědujo do slědowacych skupinow rozrjadowane:

I = hornjoserbšćina jako maćerna rěč
II = hornjoserbšćina jako druha rěč
III = hornjoserbšćina jako cuza rěč
DŁ = delnjoserbšćina jako cuza rěč
DŁ-Witaj = delnjoserbšćina jako druha rěč.

Wubědźowanja wotměwaja so we wjetšich objektach, kaž w Dźěćacym wočerstwjenskim centrumje „Querxenland“ we Wodowych Hendrichecach, w młodownjach w Budyšinje abo Bórkowach/Błóta a samo w susodnej Čěskej.

Nimo obligatoriskich pisomnych a ertnych pruwowanjow w serbšćinje skići so šulerjam wotměnjacy program z ekskursijemi, hrami a zabawnymi wječorkami.

45. centralna olympiada serbskeje rěče 2011

45. centralna olympiada serbskeje rěče wotmě so wot 30. meje do 1. meje 2011 w dźěćacym wočerstwjenišću Querxenland we Wodowych Hendrichecach. 51 šulerjow wubědźowachu so wo požadane certifikaty a myta.

Mjez 32 wobdźělnikami z Hornjeje Lužicy wudobychu sej šulerjej serbskeho gymnazija prěnje městna. Matej Cyž a Johannes Kral dóstachu predikat "Z wuznamjenjenjom".