Ferialny kurs za dźěći

Ferialny kurs za dźěći, kiž bydla zwonka serbskeho sydlenskeho ruma

W jutrownych prózdninach knježeše w Serbskim domje čiłe žiwjenje. Kóžde ranje chwatachu 26 nóžkow z Drježdźan, Berlina, Šwikawy, Weinböhla a dalšich zdalenych městow po schodźe horje do našeje biblioteki.

Tam čakaštaj na nich studentaj wučerstwa Hanka Smolic a Michał Wowčer. Cyłe dopołdnjo zaběrachu so šulerjo ze serbskim alfabetom, čitachu w serbskich knihach, zwučowachu so w pisanju a rozumjenju tekstow a spěwachu serbske spěwy.

Popołdnju wopytachu woni wšelake serbske institucije. Pod nawodom Andreje Pawlikoweje wóskowachu w Serbskim muzeju jutrowne jejka. W Serbskim rozhłosu wuspytachu so w rěčenju a spěwanju do mikrofona. Předstajenje “Ćmjeła Hana” wobhladachu sej dźěći w Dźiwadle na Hrodźe a w tamnišim fundusu wobdźiwachu rekwizity a kostimy zašłych inscenacijow. Naposledk wopytachu LND. W Smolerjec kniharni předčitachu sej šulerjo mjez sobu ze serbskich knihow a w redakciji Serbskich Nowin zhonichu, kak Dźěćiznak nastawa.

Pjatk popołdnju zakónči so ferialny kurs z małej prezentaciju šulerjow před jich staršimi, bratrami, sotrami, dźědami a wowkami.

 

0102030405060707a0809101112131415161718192021222324252627282930313233343536373839404142  

 

title Filter     Anzeige # 
# Beitragstitel