Kóžde druhe lěto organizuje Rěčny centrum WITAJ zhromadnje ze Załožbu za serbski lud Dny serbskeho dźěćaceho dźiwadla. Přeprošeni su šulerjo z Hornjeje runje tak kaž z Delnjeje Lužicy.

W skupinach dźělaja dźěći dwaj dnjej dolho zhromadnje z dźiwadźelnikami-fachowcami z Němsko-Serbskeho ludoweho dźiwadła. Woni njenazwučuja jenož dźiwadlowe kruchi, ale dyrbja tež dopokazać, zo móža spontanje podate situacije hrajersce přesadźić. Při tym stej fantazija a improwizaciski talent prašanej.  

19. dny serbskeho dźěćaceho dźiwadła 2011

Wot 13. do 14. meje 2011 wotměchu so w Dźěćacym wočerstwjenskim centrumje „Querxenland“ we Wodowych Hendrichecach 19. dny serbskeho dźěćaceho dźiwadła.
 

Dohromady 40 młodych talentow 4. do 6. lětnika Serbskeje zakładneje šule Ralbicy a Zakładneje šule Tšupc kaž tež Serbskich srjedźnych šulow Radwor, Ralbicy a Worklecy zaběraše so w dźěłarničkach z formami a móžnosćemi dźiwadźelenja. Dźěłowe skupiny nawjedowachu dźiwadźelnicy Petra Bulankec-Wenclowa, Měrko Brankačk a Torsten Šlosar a choreografka Constanze Wendisch.

Jedyn z wjerškow běše pjatk wječor zhromadne rejowanje z rejowarjomaj Serbskeho ludoweho ansambla, kotrajž zamóžeštaj wšitkich wobdźělnikow zahorić.