2. comicowe wubědźowanje w Hornjej Łužicy 2010

Na lětušim comicowym wubědźowanju je so dohromady 18 šulerkow a šulerjow Serbskeju srjedźneju šulow Budyšin a Worklecy, Srjedźneje šule Kulow kaž tež Serbskeho gymnazija Budyšin wobdźěliło.  

 Jury, kotrejž přisłušachu Pětr Šołta (redaktor Płomjenja), Katja Liznarjec (projektowa wobdźěłarka Domowiny) a Nicole Zimmermannec (wukubłanča w Rěčnym centrumje WITAJ), meješe ćežki nadawk, dobyćerjow zwěsćić. Rozsud bě tohodla tak ćežki, dokelž dyrbještej so nimo rysowankow tež ideja a rěčne přesadźenje hódnoćić.

Dobyli su:

• Luiza Pawlikec a Jessica Birkec z Budyskeho Serbskeho gymnazija ze swojim comicom "Dowol z wušparanjemi"
• Madlen Handrikec a Melanie Räßlerec ze Srjedźneje šule Kulow ze swojim comicom "Rosky a Foksi a lubosć"

Připóznawanske myto je sej wudobyła Jana Kellerec z Budyskeje serbskeje srjedźneje šule za wurjadny rysowanski stil comica "Poker".

Dźakujemy so wšitkim wobdźělnikam za kreatiwne přesadźenje swójskich idejow, wšako je wubědźowanje tež za němskich šulerjow, kiž serbsce wuknu, dobra móžnosć, so na lochke a hrajne wašnje z cuzej rěču zaběrać.