7. čitanske wubědźowanje – Najlěpši čitarjo pochadźeja z Ralbic a Worklec

Tereza Neterec ze Serbskeje zakładneje šule Ralbicy a Dawid Mark ze Serbskeje zakładneje šule Worklecy staj dobyćerjej 7. čitanskeho wubědźowanja, kotrež wotmě so sobotu, 9. apryla 2011 w Budyskej Smolerjec kniharni.
Tereza Neterec z Ralbic wudoby sej 1. městno w skupinje serbskich maćernorěčnych šulerjow a Worklečan Dawid Mark w skupinje šulerjow němskorěčneho pochada. Na wurisanju wobdźělichu so cyłkownje 21 najlěpšich čitarjow 3. lětnika serbskich zakładnych šulow.
Zaměr wubědźowanja pod motom „Knihi su zastupny lisćik do raja fantazije“, kotrež Rěčny centrum WITAJ z podpěru Ludoweho nakładnistwa Domowina a Sakskeje kubłanskeje agentury Budyšin přewjeduje, je, šulerjow hižo zahe k čitanju serbskich dźěćacych knihow wuwabić a jim scyła bohatosć literatury zbližić.
Wšitcy wobdźělnicy mějachu najprjedy publikumej z knihi tekst předčitać, kotryž su sej sami wuzwolili a doma hižo nazwučowali. Najwoblubowaniše běchu při tym knihi Madleny Nasticcyneje "Bianka a brěški", Jěwy-Marje Čornakec z powědančkami wo žabce Šlapce, wo zmiječku Paliwaku, wo myšce w mróčelach abo wo potajnstwje zeleneho kamjenja ale tež knihi awtorow Jurja Brězana, Feliksa Hajny, Hańźe Bjeńšoweje, Jana Wornarja, Wórše Šołćic a Wórše Wićazoweje. Serbscy maćernorěčni šulerjo čitachu hišće dalši – njeznaty – tekst z knihi Jurja Brězana „Rifko. Z dźenika dakla“. Tež tutón nadawk wulkotnje zmištrowachu.
K pjeć wosobow ličacej jury pod nawodom nakładnistwoweje lektorki Weroniki Žuroweje słušachu wučerce Madlena Nasticcyna a Margita Nowakowa, wučerka na wuměnku Angela Langerowa a zastupjerka Sakskeje kubłanskeje agentury Budyšin Petra Rübesamowa. Jury pohódnoći wukony šulerjow a wuznamjeni najlěpšich čitarjow.