"Knihi su zastupny lisćik do raja fantazije"

5. serbska čitanska nóc w Budyskim Dźiwadle na Hrodźe (2011) 

17 dźěći 3. a 4. lětnika serbskich zakładnych šulow z Chrósćic, Ralbic, Worklec, Pančic-Kukowa a Budyšina je pjatk, 17. junija, wječor do Budyskeho Dźiwadła na hrodźe přichwatało.

Dźěći na małej žurli jenož nječitachu, ale tam tež přenocowachu. Kòždy bě sej swoju najlubšu serbsku knihu sobu přinjesł. Po postrowjenju zeznachu šulerjo při wjedźenju dom. Po tym dožiwichu ze serbskim klankarjom Měrćinom Krawcom pućowanje přez 50-lětne stawizny klankodźiwadła.

Po zhromadnej wječeri čitaše jim serbska awtorka Beata Nastickec ze swojeje najnowšeje dźěćaceje knihi „Haperlejka“. Na to wobhladachu sej dźěći wurězk proby lěćneho dźiwadła.

Po tym sej dźěći mjezsobu wurězki ze swojich najlubšich knihow předstajichu. Zmužity sydny so jedyn po druhim před mikrofon, mjeztym zo tamni na špundowanju sedźo abo ležo připosłuchachu. To drje mnozy lóšt dóstachu sej cyłu hišće njeznatu knihu přečitać.

W přestawce podachu so dźěći na krótke nócne pućowanje, wucychnowachu so na bliskim hrajkanišću. Nimale hač do połnocy wone po tym dale ze swojich najlubšich knihow čitachu. A dokelž mějachu wšitcy nimo spanskich měchow tež kapsnu lampu sobu, tón abo tamny zawěsće tež hišće w spanskim měše ležo dale čitaše. Po zhromadnej snědani so sobotu rano čitanska nóc skónči.