Wukubłanje na překupca/-ču za běrowowu komunikaciju

  

Nicole Zimmermannec
Bywša wukubłanča na překupču za běrowowu komunikaciju
 
Po złoženju maturity nastupich w lěće 2007 w Rěčnym centrumje WITAJ swoje wukubłanje na překupču za běrowowu komunikaciju.
 
W tutym powołanju słušeja nadawki
  • w sekretariaće,
  • w zličbowanju a 
  • w personalnym wobłuku

do wšědneho dźěła.

Wězo chodźach tež na powołansku šulu  – w prěnim wukubłanskim lěće dwaj dnjej a w třećim lěće jedyn dźeń wob tydźeń. Tam wuwučuja so powšitkowne předmjety a tajke předmjety, kotrež su direktnje z powołanjom zwjazane, kaž

  • hospodarstwo,
  • běrowowa organizacija,
  • zličbowanje,
  • informatika/EDV.
Nimo toho wuči so hišće němčina, jendźelšćina, sport a etika abo nabožina.
 
Praktiski dźěl wukubłanja
 
Smědźach w RCW poměrnje samostatnje dźěłać. Tak wjedźech na přikład korespondencu k wobstaranju prawa třećich za licencne wudaća wučbnicow. Licencne wudaća su knihi, kotrež w němčinje hižo předleža a kotrež maja so w serbšćinje wudać. Za to trjebamy mjez druhim za kóždy wobraz dowolnosć fotografa za wozjewjenje w serbskim wudaću wučbnicy. Tohodla wukonjach slědowace dźěła:
 
  • Zestajach přehlad wšitkich wobrazowych awtorow a přirjadowach wotpowědne wobrazy.
  • Wobstarach adresy fotografow.
  • Pisach serijowy list z próstwu wo dowolnosć za wozjewjenje wobrazow a připołožich k informaciji kopije wotpowědnych wobrazow.
  • Rozpósćelech listy.
  • Registrowach wotmołwy, t. r. štó přewostaji nam prawo za wozjewjenje.
  • Wobdźěłach honorarne žadanja.
Rady wukonjach pak tež wšelake přidźěła k wuwiwanju didaktiskich materialijow a wučbnicow.
 
W běhu wukubłanja mějach šěsćtydźenski praktikum w zličbowanju pola Regionalbus Oberlausitz GmbH, zo bych nimo kameralistiskeho knihiwjednistwa tež dohlad do knihiwjednistwa po překupskich zasadach dóstała. Tam nawuknych mjez druhim ze wšelakimi knihowanskimi programami dźěłać. Ale zeznach tež druhe procesy we wobłuku financow. Zawod za praktikum směš sej sam/a wupytać, hewak pak ći RCW tež kooperaciskeho partnera posrědkuje.
 
Nimo toho mějach składnosć, so na třidnjowskim dalekubłanju za dźěło z programom Photoshop wobdźělić. Z tutej kwalifikaciju smědźach tež wšelake wabjenske srědki wuhotować.
 
Wulke wjeselo mějach tež při wšelakich projektach ze šulerjemi, hdźež skutkowach jako pomocnica. To běchu
  • swjedźenje serbskeje rěče
  • prózdninske campy
  • čitanske wubědźowanja a
  • čitanske nocy.
Do najrjeńšich dožiwjenjow słušeše přewod šulerjow 6./7. lětnika při stanowym lěhwje w Friziskej.
 
Nětko studuju hospodarstwo. Myslu sej, zo je moje překupske wukubłanje dobry zakład za to.