Witamy Was na domjacej stronje Rěčneho centruma WITAJ!

Witamy Was na domacnem boce Rěcnego centruma WITAJ!

Aktualne

Přećiwo planowanym skrótšenjam serbskeje wučby w Braniborskej!

Podpěrajće z Wašim podpismom planowane skrótšenja serbskeje wučby w Braniborskej! Prošu pósćelće wupjelnjenu podpismowu lisćinu hač do 4. junija 2012 na Rěčny centrum WITAJ w Choćebuzu.

46. centralna olympiada serbskeje rěče

Wot 14. do 16. meje 2012 wotměje so w Sebnicach 46. centralna olympiada serbskeje rěče, na kotruž bu 56 šulerjow 6. lětnika Hornjeje a Delnjeje Łužicy delegowanych – z toho 17 maćerno-rěčnych šulerjow, 28 šulerjow, kotrež wuknu serbšćinu po koncepće 2plus abo jako druhu rěč a 11 šulerjow z Delnjeje Łužicy. Lětsa přewjedźe so wubědźowanje k prěnjemu razej w hinašej formje. Šulerjo rozrjaduja so do małych dźěłowych skupinow (někak 4 do 5 šulerjow z rozdźělnym rěčnym niwowom) a wobdźěłaja na wšěch třoch dnjach pod nawodom fachoweho wučerja jednu temu. Srjedu prezentuja swój wudźěłk před pruwowanskej komisiju.

"Dźěći po wšěm swěće" – nowa brošurka w RCW wušła

W něhdźe 30 dźěćacych portretow wopřijacej brošurce zhonja čitarjo na přikład wo žedźbje na lěpši přichod palestinskeho hólca z Betlehema, młodym dompteru tigrow z Francoskeje, hólcu-črijerjedźerju z Indiskeje, 6-lětnym radijowym reporteru w Americe a wo tym, zo chodźa dźěći w Ghanje w šulskej uniformje do šule. Ke kóždej rozprawje su krótke informacije k topografiji, rěči abo kulturje wotpowědneho kraja přidate. Brošurku dóstanjeće w Serbskej kulturnej informaciji a w Rěčnym centrumje WITAJ w Budyšinje za škitnu płaćiznu 2,50 €.

60 lět Płomjo

K 60. narodninam serbskeho dźěćaceho časopisa Płomjo wotmě so wutoru, 24. apryla 2012 w Němsko-Serbskim ludowym dźiwadle wulka feta. k impresijam ...

Socialny dźěłaćer / socialna dźěłaćerka pytany/-a

Rěčny centrum WITAJ pyta socialneho dźěłaćerja / socialnu dźěłaćerku, kiž by wot awgusta 2012 swoje dźěło ze sydłom w Smjerdźacej nastupił(a). Wupisanje namakaće tu.

Pytaja wěcywobdźěłarki/wěcywobdźěłarja za zjawnostne dźěło 

W Domowinskim zarjedźe w Budyšinje ma so wot 1. junija 2012 městno wěcywobdźěłarki/wěcywobdźěłarja za zjawnostne dźěło wobsadźić. Wupisanje namakaće tu.

Budyšin lubuje pisanosć

1. meje maja naše socialne dźěłaćerki při zhromadnym stejnišću z TiK Budyšin kreatiwny poskitk - molowanje pisanych maskow kaž tež zhotowjenje pisanych wobalkow za handy.

"Feliks a Florian" - prěni serbski comicowy zešiwk wušoł

K 60. jubilejej Płomjenja je prěni serbski comicowy zešiwk wušoł. Za škitnu płaćiznu 2,50 € dóstanjeće jón w Serbskej kulturnej informaciji a w Rěčnym centrumje WITAJ w Budyšinje.

Přehlad kubłarskeje potrjeby w serbsce dźěłacych pěstowarnjach

Rěčny centrum WITAJ je zestajał za lěće 2012 a 2013 přehlad potrjeby serbskeho kubłarskeho dorosta we wšěch pěstowarnjach Hornjeje Łužicy, kotrež serbskorěčnje dźěłaja. Zajimcy móža sej tutón wuprosyć pod Diese E-Mail-Adresse ist gegen Spambots geschützt! Sie müssen JavaScript aktivieren, damit Sie sie sehen können. .

Pyta so serbski kubłar / serbska kubłarka

Katolski serbski dźěćacy dom "Alojsa Andrickeho" w Radworju pyta serbsku kubłarku / serbskeho kubłarja. Wupisanje namakaće tu.

8. čitanske wubědźowanje

Sobotu, 24. měrca 2012, wotmě so w Budyskej Smolerjec kniharni 8. čitanske wubědźowanje za serbskich a serbsce wuknjacych šulerjow 3. lětnika. Tu dźe k rozprawje a fotowej galeriji ...

Nowe "Lutki" wušli

Prěnje čisło informaciskeho zešiwka Lutki za 2012 wěnuje so temje "Dźiwadło". Dźěći namakaja w nim mjez druhim stawiznu "Witko a ćmjeła Hana" k zasopowědanju a wumolowanju.
k downloadowanju ...

Dalekubłanje za kubłarki a kubłarski dorost

Hladajo na sylny zajim za měrcowske dalekubłanje k temje "Rěčne spěchowanje dźěći na zakładźe wobrazowych knižkow – metoda dialogiskeho čitanja" wospjetuje so tute póndźelu, 21. meje 2012, wot 15:30 do 18:00 hodź. w sydarni Rěčneho centruma WITAJ w Budyšinje. Tu namakaće dalše informacije.

Młodźina, kedźbu! Za was!

Chceš so na 48-hodźinskej akciji młodostnych wobdźělić? Z přećelemi dobry skutk "skućić"? Wobhoń so tu a přizjew so pola nas!

Pytamy kubłarja/-ku,

kiž by 10 hodźin tydźensce w internaće Serbskeho gymnazija w Budyšinje dźěłać chcył/a. wjace ...

Comicowe wubědźowanje za šulerjow 10 do 18 lět 

Wobdźělće so ze swójskej wobrazowej stawiznu na nim – pak jako jednotliwc abo w skupinje. Najlěpše dźěła so mytuja a někotre so w Płomjenju wozjewja. Termin zapodaća w RCW je 31. meja 2012. wjace ...

Swójbna schadźowanka jara wuspěšna

Njedźelu, 26. februara 2012, zetka so něhdźe 400 dźěći a staršich na přeprošenje Rěčneho centruma WITAJ, župy "Michał Hórnik" a Serbskeho ludoweho ansambla na swójbnej schadźowance w Chróšćan "Jednoće". Hosćo dožiwichu hudźbnu bajku, dźěći zabawjachu so mj. dr. při paslenju a sportowanju, při šminkowanju, při wuknjenskich a kompjuterowych hrach. Staršim pak skići so składnosć, so z logopedku a swójbnej poradźowarku rozmołwjeć abo při kofeju a tykancu z druhimi staršimi pobjesadować. Tu dalše informacije a fotowe impresije.

Brošura "Bjarnat Krawc a wuměłcy jeho swójby" wušła

Składnostnje 150. posmjertnych narodnin Bjarnata Krawca je w RCW wušła brošurka, kiž předstaji žiwjenje a skutkowanje znateho serbskeho komponista a wuměłcow jeho swójby. Su to jeho dźowce Hanka a Rut-Marka kaž tež wnučk Jan Rawp a jeho mandźelska Lubina Holanec-Rawpowa. Brošurku dóstanjeće za škitnu płaćiznu 2,50 € w Serbskej kulturnej informaciji w Budyšinje a w Rěčnym centrumje WITAJ.

Hódaj z nami 2 - nowy blok z hódančkami wušoł

Nadawki w formje hódančkow stajeć a na nje wotmołwy pytać a wězo namakać, to je wjac hač jenož hrajkanje z rěču. Serbskorěčne hódančka móža budźić aktiwitu k produktiwno-zmysłapołnemu nałožowanju serbšćiny. Loni je prěni blok z nahladnej ličbu hódančkow wšelakich družinow z pjera Mikławša Krawca wusoł, kiž hodźa so za dźěći wot něhdźe 5. lětnika. Hódančka w druhim bloku su trochu naročniše a hodźa so tuž za dźěći wot 6. lětnika. Wobaj blokaj dóstanjeće za škitnu płaćiznu 1,50 € w Serbskej kulturnej informaciji w Budyšinje a w Rěčnym centrumje WITAJ.

Dalekubłanje kubłarkow

Přeprošujemy serbske kubłarki na dalekubłanje k temje "Rěčne spěchowanje dźěći na zakładźe wobrazowych knižkow – metoda dialogiskeho čitanja" z rěčnej terapeutku Wandu Wokowej. Tute wotměje so štwórtk, 22. měrca 2012, wot 15:30–18:00 hodź. w sydarni Rěčneho centruma WITAJ w Budyšinje. Wjace informacijow namakaće tu.

Znowa kurs hornjoserbšćiny za pokročenych w Kulowje

29. februara započina so dalši kurs hornjoserbšćiny za pokročenych w Kulowje. Maće-li zajim, přizjewće so prošu hač do 17.02.2012 pod telefoniskim čisłom 03591 550400 abo e-mejlnje pod Diese E-Mail-Adresse ist gegen Spambots geschützt! Sie müssen JavaScript aktivieren, damit Sie sie sehen können. .

Dźěłowy plan přez komisiju za serbske wučbnicy schwaleny

Wudawanje 29 nowych serbskorěčnych titulow - wučbnicow a materialijow - planuje Rěčny centrum WITAJ lětsa. wjace ...

Konferenca k europskej rěčnej politice za regionalne a mjeńšinowe rěče 

17./18. januara 2012 wotměje so w italskim Bozenje konferenca  RML2future k europskej rěčnej politice za regionalne a mjeńšinowe rěče. Na njej wobdźělitej so ze stron Serbow nimo jednaćela Domowiny Bjarnata Cyža a referenta za kulturne naležnosće a wukraj Clemensa Škody tež wotrjadnica RCW Annett Dźědźikowa a naša sobudźěłaćerka Michaela Hrjehorjowa.  

Stipendije za kurs čěšćiny w Čěskej

Čěske knježerstwo přewostaja zajimowanym Serbam cyłkownje pjeć stipendijow za wobdźělenje
na 4-tydźenskim rěčnym kursu čěšćiny w Čěskich Budějovicach wot 20.8. do 7.9.2012 abo w
Praze wot 27.7. do 24.8.2012. Sposrědkowanje stipendijow ma na starosći Rěčny centrum
WITAJ. Zajimcy njech so tu pola nas hač do 29.2.2011 přizjewja. Hrube informacije namakaće tu. Trěbne podłožki a detailniše informacije sej prošu pola nas wuprošće.

Žohnowane hody a strowe nowe lěto

Přejemy wšitkim kubłarkam, wučerkam a wučerjam, awtoram a dopisowarjam a wšitkim našim pilnym podpěraćelam hnadypołne hodowne swjate dny a žohnowane, strowe a spokojne lěto 2012.Dźakujemy so za wšu podpěru a dokonjane spomožne zhromadne dźěło na dobro rozwiwanja a šěrjenja serbskeje rěče. W nowym lěće přejemy strowotu, zbožo a wuspěch w narodnej słužbje a we wosobinskim žiwjenju.

Nowy lětak wo internaće wušoł

Rěčny centrum jako wobhospodar Internata Serbskeho gymnazija Budyšin je wudał lětak wo žiwjenju w internaće w serbšćinje a němčinje. Lětak namakaće tu.

10 lět RCW

Rěčny centrum WITAJ woswjeći w lěće 2011 swój 10-lětny jubilej. Při tutej składnosći wuńdźe w awgusće pedagogiski časopis Serbska šula jako wosebity zešiwk, w kotrymž so sobudźěłaćerjo Rěčneho centruma WITAJ ze swojim dźěłom předstaja. Nimo toho přeprošachmy 7. oktobra wšitkich partnerow a zajimcow na dźeń wotewrjenych duri. W februaru organizowachmy zhromadnje ze župu "Michał Hórnik" a Serbskim ludowym ansamblom popołdnjo za swójby w Chrósćicach. Za pedagogow Delnjeje Łužicy zarjadowachmy w kooperaciji z RBB dnja 10. apryla w Choćebuzu dźaknu matineju.

Dnjowa mać / dnjowy nan pytana/-y

Towarstwo "Stup dale" pyta dnjowu mać abo dnjoweho nana, kiž by w Drježdźanach serbske dźěći kubłał(a). Wupisanje namakaće tu.

Informacije zašłych měsacow