| Zarjadowanje: Wobhladaj sej swět, ale nawróć so! |
|
"Wobhladaj sej swět, ale nawróć so!" 2011
Pod hesłom "Wobhladaj sej swět, ale nawróć so!" přewjedźe so 13. oktobra 2011 wospjet projekt za šulerjow 11. a 12. lětnika na Serbskim gymnaziju w Budyšinje k powołanskej orientaciji. Prěnička: "Wobhladaj sej swět, ale nawróć so!" 2010 Pod hesłom "Wobhladaj sej swět, ale nawróć so!" přewjedźe so 18. nowembra 2010 pilotowy projekt za šulerjow 11. a 12. lětnika na Serbskim gymnaziju w Budyšinje. Zaměr zarjadowanja bě, šulerjam pokazać móžne studijne resp. wukubłanske puće po maturje. K tomu rysowachu serbscy studenća mj. dr. z Lipska a Drježdźan swój puć wot namakanja studijneho směra a započatka studija na uniwersiće. Šulerjam poskićichu so wšelake dźěłarnički, hdźež zhonichu, kak so požadanje w formje motiwaciskeho lista pisa. Jim sposrědkowachu so tež informacije k financowanju studija abo k wšelakim dobrowólnym słužbam. Potom rozprawjachu přeprošeni studenća wo swojim studiju abo wukrajnym lěće a rysowachu mjez druhim njewočakowane problemy, na kotrež při pytanju studijneho směra storčichu. Wažne bě, šulerjam wuwědomić, što měli wobkedźbować, hdyž chcedźa so na wotpowědny studij podać. Wězo wopisowachu studenća tež serbske studentske žiwjenje w Drježdźanach a Lipsku a dawachu zajimcam pokiwy, hdźe dokładnje měli so sčasom přizjewić, jeli chcedźa na serbskej etaži abo w serbskim internaće bydlić. Z toho nawjazane rozmołwy mjez šulerjemi a studentami polěkowachu k tomu, zo móžeše so tón abo tamny zajimc dokładnišo do swojeho přichodneho puća po maturje zamyslić a z toho prawe rozsudy tworić. Zarjadowarjo běchu Serbske młodźinske towarstwo PAWK, zamołwita za projekt "Přichod we Łužicy přez dwu- a wjacerěčnosć" w nošerstwje Domowiny z. t. a Serbski gymnazij Budyšin. |
