Dalekubłanje k temje „Serbske dźěćace spěwy“

Cyłkownje dźesać kubłarkow z pěstowarnjow Rowno, Hory a Budyšina a wučerce ze zakładneje šule Slepo sćěhowaše wčera popołdnju přeprošenju Rěčneho centruma WITAJ do Serbskeho kulturneho centruma (SKC) Slepo na dalekubłanske zarjadowanje. Woni zeznachu prěnju serbsku karaokowu DVDju za dźěći a nazwučowachu dźěćace spěwy. Při nadźěłanju spěwow předstaji knjeni Leńka Thomasowa zajimawe metodiske pokiwy za dźěło z dźěćimi. Wušiknje sposrědkowa wona kubłarkam při tym tež zakładnu wědu hudźbneje teorije a serbsku leksiku.

Pytaja kubłarku/kubłarja

W gmejnje Halštrowska Hola pytaja k 01.01.2012 kubłarja/kubłarku za dwurěčnu pěstowarnju. Dale k wupisanju dźěłoweho městna ...

Pytamy šulskeho socialneho dźełaćerja/šulsku socialnu dźěłaćerku

K 1. januarej 2012 pytamy – najprjedy jónu na dwě lěće – šulskeho socialneho dźěłaćerja/šulsku socialnu dźěłaćerku. Dale k wupisanju dźěłoweho městna ...

Swójbny dźeń w Smochćicach

Rěčny centrum WITAJ přeprošuje wutrobnje na swójbny dźeń, kotryž wotměje so sobotu, 26. nowembra 2011, w Smochćičan Domje biskopa Bena. Zajimcow prosymy, so hač do 17. nowembra 2011 přizjewć. Dalše informacije namakaće tu.

Prózdninski camp nad Budyskim spjatym jězorom

Rěčny centrum WITAJ přewjedźe tež lětsa zaso w prěnim tydźenju nazymskich prózdnin camp za šulerjow 3. a 4. lětnika dwurěčnych rjadownjow. Dohromady 18 dźěći z Wojerec, Slepoho, Budyšina, Pančic-Kukowa, Radworja a Chrósćic poda so pjeć dnjow do wočerstwjenišća za šulerjow w Bórku pola Budyšina, zo bychu zhromadnje pućowali, spěwali, rejowali a paslili, potajkim přežiwili zabawjace a wotměnjace prózdninske dny w intensiwnej serbskorěčnej atmosferje.

Informaciski zešiwk Lutki wušoł

W lětušim třećim wudaću zhladuje so na 10-lětne stawizny Lutkow. Dźěći zhonja w stawizničce, kotrejž je so mnoho rjanych wobrazow k wumolowanju přidało, kotremu zaměrej wudaće tutoho zešiwka słuži.

28. staflowy běh wo pokal "Płomjenja"

Štwórtk, 13. oktobra 2011, nastupi w Ralbičanskim „Stadionje přećelstwa“ sydom mustwow šulerjow 5. do 8. lětnika ze serbskich šulow a šulow ze serbskej wučbu wubědźowanje w staflowym běhu. Dobyło je Ralbičanske 1. mustwo. wjace ...

Serbscy šulerjo na filmowym festiwalu

Srjedu, 12. oktobra 2011, přebywa skupina šulerjow SSŠ Ralbicy z Michaelu Hrjehorjowej z Rěčneho centruma WITAJ na 16. mjezynarodnym filmowym festiwalu „Šibałc“ w Kamjenicy. Skupina z Łužicy wobdźěli so na dźěłarničce k temje „Domizna a identita“ a dožiwi wjacore filmowe premjery, mjez druhim z Chorwatskeje a Južneje Ameriki.

Dźeń wotewrjenych duri

Pjatk, 7. oktobra 2011, smědźachmy něhdźe 75 zajimowanych wopytowarjow w našich rumnosćach witać a jim pokazać štó smy a na čim dźěłamy. Wutrobny dźak za Waš wopyt!

Kubłanska konferenca RML2FUTURE

Wot 27. hač do 29. septembra 2011 wotmě so w awstriskim Celovcu regionalna konferenca syće za wjacerěčnosć a rěčnu mnohotnosć w Europje. Na njej wobdźělichu so nawoda delnjołužiskeje wotnožki RCW Měto Nowak, wědomostna sobudźěłaćerka RCW Jadwiga Kaulfürstowa a Budyska regionalna rěčnica dr. Hilža Elina. Woni předstajichu tam system kubłanja we Łužicy.

Přińdźće na čěske zarjadowanja a aktiwizujće swoje znajomosće čěšćiny!

Rěčny centrum WITAJ zarjaduje wot 15. do 20. awgusta swój 3. intensiwny kurs čěšćiny w Chrósćicach. Jednotliwe zarjadowanja kaž spěwny a filmowy wječork kaž tež přednoški w čěšćinje su wšitkim zajimcam přistupne. Wutrobnje přeprošujemy! přehlad zarjadowanjow

Pytaće dar za šulskich nowačkow?

Pohladajće tu – z wěstosću něšto zajimaweho namakaće!

Rěčny centrum WITAJ pyta wědomostneho sobudźěłaćerja

Pytamy wědomostneho/-u sobudźěłaćerja/-ku za rěčny marketing. Wjace informacijow tu.

Pytaja kubłarku/kubłarja

Pěstowarnja na Horach "Lutki" w gmejnskim nošerstwje je wupisała městno za kubłarja/kubłarku ze serbskorěčnymi kmanosćemi k wobsadźenju wot 1.9.2011. wjace ...

Prěnja serbska Karaoke-DVD

Předleži testowa wersija prěnjeje serbskeje Karaoke-DVD, kotraž nastawa w zhromadnym dźěle RCW z SAEK Budyšin. Za namjety k polěpšenju abo krótku rozprawu wo nazhonjenjach při wupruwowanju bychmy jara dźakowni byli. Telefonisce prošu 03591/550 417, z mejlku na Diese E-Mail-Adresse ist gegen Spambots geschützt! Sie müssen JavaScript aktivieren, damit Sie sie sehen können.

Žarujemy wo Rafaela Wowčerja

Dóstachmy zrudźacu powěsć, zo je 12. julija 2011 prěni nawoda Rěčneho centruma WITAJ knjez Rafael Wowčer po ćežkej chorosći w starobje 60 lět zemrěł. Cyłe swoje žiwjenje je horliwje skutkował w serbskim narodnym dźěle a na polu kubłanja serbskeho dorosta. Z wutrobu je so zasadźował za hajenje a wožiwjenje serbskeje rěče. Swojim sobudźěłaćerjam a partneram bě kóždy čas wotewrjeny, sprawny a dobry poradźowar. Jeho njesebične skutkowanje wostanje nam ze stajnym přikładom.

Pytaja kubłanskeho/-u referentu/-ku za serbske młodźinske dźěło

Serbske młodźinske towarstwo Pawk z. t. pyta k 1. awgustej 2011 kubłanskeho/-u referentu/-ku za serbske młodźinske dźěło. Dokładniše informacije namakaće tu.

Druhe čisło Lutkow za 2011 wušło

Hłowna tema tutoho wudaća Lutkow su domjace zwěrjata.

Prózdninske dźěło w pěstowarnjach

Rěčny centrum WITAJ poskićuje lětsa zaso serbskim młodostnym nad 16 lětami móžnosć prózdninskeho dźěła na dwaj tydźenjej w pěstowarnjach, zo bychu so ze serbsce wuknjacymi dźěćimi zaběrali a je tak intensiwnje při wuknjenju rěče podpěrali. W kotrych pěstowarnjach a w kotrym času je tole móžno, zhoniće tu.

Intensiwny kurs čěšćiny 2011

Wot 15. do 20. awgusta 2011 zarjaduje Rěčny centrum WITAJ intensiwny kurs čěšćiny za Serbow w Chrósćicach. Čech Pavel Šlechta budźe wšědnje šěsć hodźin wuwučować. Po popołdnjach budu čěscy hóstni referenća w jich maćeršćinje k čěskej kulturje a stawiznam přednošować. Nimo wulěta do Čěskeje su zabawne wječorki z čěšćinu planowane. wjace ...

Čitanska nóc w Dźiwadle na Hrodźe

17./18. junija 2011 přeprošuje Rěčny centrum WITAJ zhromadnje z Němsko-Serbskim ludowym dźiwadłom na 5. čitansku nóc. Tuta zahaji so w 17:30 hodź. z wjedźenjom po domje a přez 50-lětne stawizny klankodźiwadła. Po zhromadnej wječeri dožiwja šulerjo zabawne čitanja z překwapjenkami. Wězo smě so kóždy tež sam w čitanju pospytać a swoju najlubšu knihu předstajić. Nóc zakónči so sobotu, 18. junija, po snědani.

45. olympiada serbskeje rěče

Wot póndźele, 30. meje, hač do srjedy, 1. junija 2011, přewjedźe so we Wodowych Hendrichecach 45. olympiada serbskeje rěče. Rozprawu a fotowe impresije namakaće tu.

Impresije swójbneho popołdnja w Kulowje

Štwórtk, 2. junija 2011, přeprosy Rěčny centrum WITAJ na swójbne popołdnjo do Kulowa. Impresije zarjadowanja namakaće tu.

"Hódaj z nami" – blok ze serbskimi hódančkami wušoł

Nadawki w formje hódančkow stajeć a na nje wotmołwy pytać a wězo namakać, to je wjac hač jenož hrajkanje z rěču. Serbskorěčne hódančka móža budźić aktiwitu k produktiwno-zmysłapołnemu nałožowanju serbšćiny. "Hódaj z nami" je blok z nahladnej ličbu hódančkow wšelakich družinow z pjera Mikławša Krawca. Wone hodźa so za dźěći wot něhdźe 5. lětnika. Blok dóstanjeće za škitnu płaćiznu 1,50 € w Rěčnym centrumje WITAJ.

Přednošk před zajimowanymi staršimi

W pěstowarni "Glückskäfer" w Budyšinje ma so nazymu prěnja serbska skupina załožić. Wjace hač 20 staršim, kotřiž maja zajim, swoje dźěćo za tutu skupinu přizjewić, je Jadwiga Kaulfürstowa móžnosće serbskorěčneho kubłanja w pěstowarnjach předstajiła. Wučerka Serbskeje zakładneje šule Budyšin, knjeni Šewcowa, rozłožowaše jim zakłady serbskorěčneho kubłanja na swojej šuli.

Přeprošenje na swójbne popołdnjo

Přeprošujemy wšitkich, kotrychž dźěći so dwurěčnje kubłaja, na swójbny dźeń štwórtk, 2. junija 2011, do Kulowa. W 15 hodź. zetkamy so na Kulowskim torhošću. Při wjedźenju přez město zhonja dźěći a starši zajimaweho wo Krabatowej kónčinje. Sćěhuje zhromadny picknick na hrajkanišću katolskeho dźěćaceho domu „Jakubetzstift“ ke kotremuž sej prošu kóždy něšto sobu přinjese. Přizjewće so prošu telefonisce w Rěčnym centrumje WITAJ (03591 550 418) hač do wutory, 31.05.2011. Jeli so dešćuje, pućowanje njebudźe!

19. dny serbskeho dźěćaceho dźiwadła

Wot 13. do 14. meje 2011 přewjedźechu so we Wodowych Hendrichecach 19. dny serbskeho dźěćaceho dźiwadła. 40 šulerjow z Hornjeje a Delnjeje Łužicy wuspytachu so we wšelakich dźěłarničkach, kotrež nawjeduja dźiwadźelnicy NSLDź.

Radworscy šulerjo na wopyće w RCW

26 šulerjow 4. lětnika wopytachu wutoru, 10. meje 2011 RCW. Po krótkim witanju dźělichu so woni do dweju skupinow a zaběrachu so wotměnjejo z nastaćom dźěćaceho časopisa Płomjo a ze serbskej leksiku při hraću scrabble. wjace ...

Nowa wabjenska brošura za serbskorěčne kubłanje w pěstowarnjach

"WITAJ – ein Geschenk für Ihr Kind" je titul noweje němskorěčneje brošury, kotraž je aktualnje w Rěčnym centrumje WITAJ w Budyšinje wušła. Wona měri so w prěnim rjedźe na němskich staršich, kotřiž wo tym rozwažuja, swoje dźěćo w pěstowarni serbskorěčnje kubłać dać. W 24-stronskim zešiwku předstajeja so principije imersiwneho kubłanja po koncepcji WITAJ – na kotre wašnje kubłarka bjez pomocy němčiny dźěćom wšědny dźeń serbšćinu a serbsku kulturu zbliža a kotre faktory wuspěch rěčneho kubłanja wobwliwuja. wjace ...

Dalša synchronizacija dźěćaceho filma - přeprošenje na probowe nahrawanje

Rěčny centrum WITAJ chce zhromadnje z SAEK synchronizować danski dźěćacy film „Karla a Katrina“. Za to pytaja so wosebje holcy, ale tež hólcy w starobje 11 do 13 lět, kotřiž maja lóšt na rěčenje a hraće před mikrofonom. Zajimcy njech so prošu přizjewja pod telefoniskim čisłom 03591 550400 abo přińdu na probowe nahrawanje wutoru, 17. meje 2011 wot 13:45 do 15:00 hodź. do SAEK w Budyšinje na dr. Arnošta Mukowej dróze 8. Štóž je hižo wćipny a chce w předpolu trochu zwučować, njech sej wobhlada trailer.

Wubědźowanje mydłowych kistow

Wubědźowanje wo najspěšnišu mydłowu kistu 2011 přewjedźe redakcija Płomjenja njedźelu, 8. meje, 14:30 hodź. na Sydlišćowym puću w Róžeńće. Startuja pjeć mustwow, z toho tři ze Serbskeje srjedźneje šule Ralbicy, jedne ze Srjedźneje šule Slepo a jedne ze Serbskeho gymnazija Budyšin.

Nowy nawoda za delnjołužisku wotnožku RCW

Dr. Beata Brězanowa je 2. meje 2011 knjeza Měta Nowaka jako noweho nawodu delnjołužiskeje wotnožki RCW do swojeho zastojnstwa zawjedła. 32-lětny wjedźe z tym dźěło swojeho předchadnika Kita Ele dale, kotryž je so kónc apryla na wuměnk podał.

Dalekubłanje wučerkow serbšćiny

Rěčny centrum WITAJ přeprošuje wučerki zakładnych šulow, podawacych serbšćinu dźěćom, kiž su bjez předznajomosćow serbšćiny do šule přišli na dalekubłanje. Zarjadowanje k temje "Cuzorěčne kubłanje na přikładźe dyrdomdeja z jendźelšćinu" wotměje so štwórtk, 5. meje 2011, wot 16:30 do 19:00 hodź. w sydarni rěčneho centruma. Hóstna referentka je Beate Tarrach.

Dobrowólne socialne lěto w kulturje - požadanja su hišće móžne

Pod hesłom "Knihi su zastupny lisćik do raja fantazije" zarjadowaše Rěčny centrum WITAJ lětsa hižo k 7. razej čitanske wubědźowanje za šulerjow 3. lětnika.

Prěnje čisło Lutkow za 2011 wušło

Hłowna tema tutoho wudaća Lutkow je hudźba. Dźěći a starši zhonja mjez druhim tójšto zajimaweho z dźěła Serbskeho ludoweho ansambla. Nimo toho dóstanu dźěći nawod, kak móža sej sami hudźbne instrumenty twarić.

Serbski ABC online

W formje interviewa běchu młodostni namołwjeni, podać swoje asociacije a prěnje mysle k wosebitym zapřijećam wot ‘A‘ kaž ansambl hač k ‘Ž‘ kaž župa. Mysle, nastorki a přeća młodostnych maja k přemyslowanju pohnuć a wid na wšelakore zjawy našeje towaršnosće wobswětlić. Serbski ABC je zhromadny projekt Serbskeho młodźinskeho towarstwa PAWK z.t. a projekta „Přichod we Łužicy“, spěchowany přez směrnicu demografija Sakskeje statneje kenclije. Wjace pod http://www.serbski-abc.de/wobsah.htm

Dalekubłanje kubłarkow

Rěčny centrum WITAJ přeprošuje serbske kubłarki na dalekubłanje k temje "Zažne rěčne kubłanje w pěstowarnjach na přikładźe dyrdomdeja z jendźelšćinu" – a to sobotu, 19. měrca 2011, wot 9:00 do 12:00 hodź. do swojeje sydarnje. Hóstna referentka je Beate Tarrach.

Rěčny kurs serbšćiny za předšulske dźěći

K přihotej předšulskich dźěći bjez znajomosćow serbšćiny na wopyt serbskeje rjadownje poskićuje Rěčny centrum WITAJ prěni króć starobje dźěći wotpowědowacy rěčny kurs serbšćiny.

Móžnosće studija w Čěskej

Přez posrědnistwo Rěčneho centruma WITAJ móža so Serbja powabić wo stipendij za jedno- abo dwusemestrowy studij na jednej čěskej wysokej šuli abo uniwersiće a za kurs metodiki wuwučowanja čěšćiny.

Stipendije za kurs čěšćiny

Čěske knježerstwo poskićuje Serbam (wot 18 lět) cyłkownje pjeć stipendijow za wobdźělenje na štyritydźenskim rěčnym kursu čěšćiny wot 4.7. do 29.7.2011 w Poděbradach. Štóž ma zajim, so na nim wobdźělić, njech so hač do 7.3. přizjewi w Rěčnym centrumje WITAJ pak telefonisce pod čisłom 03591 / 550 400 abo z e-mailku.

Dźěłowy plan přez komisiju za serbske wučbnicy schwaleny

Wudawanje 28 nowych serbskorěčnych titulow - wučbnicow a materialijow - planuje Rěčny centrum WITAJ w swojim jubilejnym 10. lěće wobstaća.

Dalekubłanje za kubłarski dorost a młodych kubłarjow

Rěčny centrum WITAJ přeprošuje serbski kubłarski dorost a młodych kubłarjow na dalekubłanje k temje "Zažne rěčne kubłanje w pěstowarnjach na přikładźe dyrdomdeja z jendźelšćinu" – a to sobotu, 22. januara 2011, dopołdnja wot 9:00 hodź. do swojeje sydarnje. Hóstna referentka je Beate Tarrach, we Łužicy tež znata jako "Liederliesel".

Domino-hry za serbske dźěći

Pedagogiski wotrjad Rěčneho centruma WITAJ je zestajał serbskorěčne domino-hry, kotrež su tele dny w Ludowym nakładnistwje Domowina wušli. "Domino ze słowami" z rozdźělnym stopjenjom ćežkosće poruči so wosebje maćernorěčnym a rěčnje měšanym swójbam z dźěćimi, kiž wopytuja zakładnu šulu. Kupić móžeće sej jón za 12 € w Smolerjec kniharni w Budyšinje.

Nowa serbska DVD "Gilles" wušła

Wot srjedy, 15.12.2010 je DVD serbsce synchronizowaneho belgiskeho filma "Gilles" w Serbskej kulturnej informaciji, Smolerjec kniharni a we wšěch wobchodach na wsach, w kotrychž so serbske knihi předawaja, za 10 € na předań.

Dokumentacija rěčneho wuwića dźěći

Za dźěći, kotrež w pěstowarni serbsce wuknu, je so w Rěčnym centrumje WITAJ nadźěłał material, z kotrymž móža kubłarki jich jednotliwe rěčne wuwićowe schodźenki w serbšćinje dokumentować. Tak mjenowana Dokumentacija RWSS, kotraž je so pěstowarnjam ze serbskorěčnym poskitkom rozdźěliła, słuži kubłarkam ke kontroli swójskeho dźěła a němskim staršim kaž tež ewtl. dalšim zajimcam k informaciji wo pokrokach dźěći w serbšćinje.

Holcy z najlěpšim handyjowym widejom

W septemberskim čisle Płomjenja smy wubědźowanje wo najlěpše serbske handyjowe widejo wupisali. Na to dóńdźechu pjeć wideja do redakcije. Po horcych diskusijach je so jury tola hišće za dobyćerske widejo rozsudźić móhła. Dobyło je ryze holče mustwo! Lea Šefrichec, Marija Paškec, Terezija Rawšec a Nina Krawčikec z Budyskeho serbskeho gymnazija su jury z krótkofilmom wo jěchanju na ponyju přeswědčili. Tute sće zawěsće hižo w decemberskim wusyłanju WUHLADKA widźeli. Wjace wo tym móžeće w februarskim čisle Płomjenja 2011 čitać. Wutrobnu gratulaciju dobyćerkam a wjele wjesela při cyłodnjowskim wulěće!

Nowy material za WITAJ-skupiny

Rěčny centrum WITAJ je wudał nowy material za sportowu zaběru w předšuli. Na třoch A2-plakatach wuhladaš 18 wuchadnych pozicijow a 8 porikowych přimnjenjow z hornjoserbskim a němskim pomjenowanjom. Zestajała je material Gunda Heyderowa a Barbara Beger wuhotowa jón ze spodobnymi ilustracijemi. Plakaty ze skazanskim čisłom P-0/172/10 móžeće sej w Rěčnym centrumje WITAJ skazać.

Serbska wuknjenska software za zakładnu šulu

Nowa serbska kompjuterowa CD za dźěći z 15 interaktiwnymi hrami k skrućenju hornjoserbskeho alfabeta je w Budyskej Smolerjec kniharni za 15 € na předań. Ju doporuča Rěčny centrum WITAJ tež serbskorěčnym a rěčnje měšanym swójbam, kiž maja dźěći předewšěm w 1. abo 2. lětniku, k skrućenju a rozšěrjenju serbskeho słowoskłada.

Staršiski kruh – WITAJ/2plus

Waše dźěćo chodźi do rjadownje, w kotrejž so po koncepće 2plus wuwučuje? Wy njejsće pak sej wěsta/-y, zo wone jako maćernorěčno-serbske dźěćo serbšćinu na dosć wysokim niwowje wuknje? Při tajkich a podobnych wobmyslenjach móžeće so rady na staršiski kruh wobroćić.

Štwórte čisło Lutkow za 2010 wušło

Serbske nałožki a wašnja po nowym lěće wopisuja so w štwórtym čisle Lutkow za lěto 2010. Hłowna tema tutoho wudaća je ptači kwas. Dźěći namakaja fotowy słowničk wo ptačkach, stawiznu k wumolowanju a zasopowědanju a stronu z ličenkami. Serbskim staršim předstaji so dnjowa mać w Jaseńcy. Němscy starši pak zhonja mnoho zajimaweho wo dwurěčnej swójbje, kotraž bydli blisko Šwikawy. We wosebitym dźělu namakaja kubłarki nowe serbske spěwy a hrónčka za ptačokwasny program.

Dalekubłanje za kubłarki

Na dalekubłanskim zarjadowanju Rěčneho centruma WITAJ, kotrež wotmě so srjedu, dnja 24. nowembra 2010, w awli Serbskeje zakładneje „Šule Ćišinskeho“ w Pančicach-Kukowje, wobdźělichu so 24 kubłarkow. Logopedka Marija Maccyna přednošowaše k hygienje hłosowkow. Kubłarki wuspytachu při tym mnoho zwučowanjow k skrućenju hłosa. Po krótkej přestawce nazwučowachu zajimće pod nawodom Marije R.-Šołćineje nowe serbske spěwy a reje za ptačokwasny program. Na kóncu předstaji Silwija Wjeńcyna didaktiski material za kubłarki, kiž je RCW wudał.

Pytamy kubłarku/kubłarja

W internaće Serbskeho gymnazija Budyšin ma so hnydom městno kubłarki/kubłarja wobsadźić. wjace ...  

Dalekubłanje za wučerki hudźby zakładnych šulow

Pjatk, 19. nowembra 2010, wotmě so w Serbskej zakładnej šuli Budyšin pod nawodom Leńki Thomasoweje a Gabriele Bajtloweje dalekubłanje k temje „Didaktisko-metodiski nawod k nowym spěwam a rejam z wučbnicow Wjeseli hercy 1/2 a Wjeseli hercy 3/4. Zarjadowar bě Rěčny centrum WITAJ.

Swójbne popołdnjo w Budyšinje  

Rěčny centrum WITAJ přeprošuje srjedu, 17.11.2010, wšitke swójby, kotrychž dźěći w pěstowarni serbsce wuknu, na swójbne popołdnjo do Serbskeho domu w Budyšinje. 15 hodźin zahaji Łužiski klankar Měrćin Krawc ze swojim serbskim klankodźiwadłom „Pintlašk“ zhromadne popołdnjo. Po tym móža so starši při šalce kofeja rozmołwjeć a sej swoje nazhonjenja při dwurěčnym kubłanju wuměnjeć. W samsnym času maja dźěći składnosć k paslenju a molowanju. Wosebita překwapjenka njech je wustajeńca k 50-lětnemu jewišćowemu jubilejej Měrćina Krawca, kotraž chce wopytowarjow do małeje dźěłarnje klankarja wabić.

Projekt "Za kulisami klankodźiwadła" za pěstowarnju a šulu

Wustajeńcu k 50. jewišćowemu jubilejej serbskeho klankarja Měrćina Krawca, kotraž so srjedu, 10. nowembra 2010, w Serbskej kulturnej informaciji w Budyšinje wotewri, chcemy na wosebite wašnje tež dźěćom spřistupnić. Tuž poskićujemy pěstowarnjam a zakładnym šulam w času wot 11.11.2010 do 28.01.2011 zhromadnje ze SKI projekt „Za kulisami klankodźiwadła“. Je to dźěłarnička, kotraž so po indiwidualnym dorěčenju w Serbskej kulturnej informaciji z klankarjom přewjedźe. Wjeselimy so na Waše přizjewjenja pod telefoniskim čisłom 03591 550418.

Klankodźiwadłowa turneja

22.10.2010 zahaji so dalša klankodźiwadłowa turneja za pěstowarske dźěći, kotruž Rěčny centrum WITAJ organizuje a přewodźuje. Měrćin Krawc a Borbora Markowa, kotrajž staj mnohim w pěstowarnjach a zakładnych šulach znataj přez lońšu turneju "Witko a padu", zahrajetaj hru „Pintlašk“.

Karta serbskeje Łužicy – pod Klóštrom, Kaponicu a Budyšinom

Rěčny centrum WITAJ je sfałdowanu kartu ze serbskim pomjenowanjom wjeskow, šćežkow, wodźiznow a ležownosćow wudał. Mnoho tutych pomjenowanjow so w młódšej generaciji hižo njewužiwa. Mjena zezběrał a redakciju přewzał je Jurij J. Šołta. Handrij Bjeńš je so wo grafiske wuhotowanje postarał. Karta je wot 25.10.2010 za škitnu płaćiznu we wysokosći 5 € w Serbskej kulturnej informaciji w Budyšinje na předań. wurězk z karty

Něme karty za zakładnu šulu

Něme karty města Budyšin a serbskich gmejnow za zakładnošulsku potrjebu namakaće tu.

Serbska rěč so stajnje wuwiwa

Na internetowej stronje www.serbterm.de namakaja zajimcy najwšelakoriše serbske fachowe zapřijeća po fachowych polach rozrjadowane. Hustohdy faluja němskim wurazam serbske wotpowědniki. Serbska online-terminologija skića móžnosć, spěšnje a kóždy čas za słowami pytać abo słowa sam zapisować. Wosebity system podate zapřijeća hódnoći a tak přiwza abo wotpokaza. Kóždy móže so na SerbTerm wobdźělić a k rozšěrjenju serbskeho słowoskłada přinošować.

27. staflowy běh wo pokal Płomjenja

Kóždolětny staflowy běh wo pokal Płomjenja wotměje so lětsa srjedu, 20. oktobra 2010, w Ralbicach. Šulerjam 5. do 8. lětnika serbskich srjedźnych šulow Budyšin, Radwor, Worklecy a Ralbicy, srjedźnych šulow Kulow, Slepo a Wóslink kaž tež Serbskeho gymnazija Budyšin přejemy wjele wjesela a wuspěcha při napjatym boju wo požadany pokal. Wosebje so wjeslimy, zo směmy lětsa nowačka witać: Ewangelska srjedźna šula Wóslink, hdźež so tež serbšćina podawa, wobdźěli so k prěnjemu razej ze swójskim mustwom.

Prózdninski camp nad Budyskim spjatym jězorom

Rěčny centrum WITAJ přewjedźe tež lětsa zaso w prěnim tydźenju nazymskich prózdnin camp za šulerjow 3. a 4. lětnika dwurěčnych rjadownjow. Dohromady 21 dźěći z Wojerec, Slepoho, Budyšina, Ralbic, Pančic-Kukowa, Worklec a Chrósćic poda so pjeć dnjow do wočerstwjenišća za šulerjow w Bórku pola Budyšina, zo bychu zhromadnje pućowali, spěwali, rejowali a paslili, potajkim přežiwili zabawjace a wotměnjace prózdninske dny w intensiwnej serbskorěčnej atmosferje.

Poradźowanske rozmołwy za staršich

Swjedźeń serbskeje rěče 2010 w Radworju

Srjedu, 29. septembra 2010, wotmě so k 6. razej swjedźeń serbskeje rěče w Radworskej „Slawiji“. Swjedźeń organizuje RCW kóždolětnje za dźěći 4. lětnika, kotřiž serbšćinu jako cuzu rěč wuknu. Wjace hač 100 šulerjo z Wulkeje Dubrawy, Hodźija, Bošec, Bukec, Kulowa, Njeswačidła a Radworja so na nim wobdźěli.

15. mjezynarodny filmowy festiwal "Šibałc"

Wot 27. hač do 29. septembra 2010 přebywaše skupina šulerjow SSŠ Worklecy ze swojej wučerku Sabinu Žurowej a zastupjerku Rěčneho centruma WITAJ Michaelu Hrjehorjowej na 15. mjezynarodnym dźěćacym filmowym festiwalu „Šibałc“ w Kamjenicy. wjace ...

Belgiski dźěćacy film „Gilles“ serbsce synchronizowany

Nowe wudaće informaciskeho zešiwka Lutki wušło 

Kónc junija je druhe čisło Lutkow za 2010 wušło. Hłowna tema tutoho wudaća su serbska narodna drasta a drastowe regiony. Nimo pisanych fotow a wumolowankow za dźěći namakaja němskorěčni starši słowničk kaž tež pokiwy k poradźowanskim časam Rěčneho centruma WITAJ. Zajimawej za staršej stej tež přinoškaj wo rěčnych rozdźělach hornjo- a delnjoserbšćiny a wo statistice wuwića WITAJ-skupin. Kubłarki namakaja we wosebitym dźělu metodiske doporučenja k wuwiću serbskeje identity kaž tež stawizničce za masažu a fantazijowe pućowanje z paslenskej předłohu. wjace ...

Dalekubłanje za kubłarki z mjezynarodnje připóznatej fachowču

Rěčny centrum WITAJ je 22. junija 2010 přewjedło dalekubłanje za kubłarki z knj. Christine Le Pape Racine ze Šwicy, kotraž rěčeše k temje: Vom Erwerb der sorbischen Sprache bis zur Mehrsprachigkeit. Einführung ins Thema – Erfahrungsaustausch – Perspektiven für das alltägliche Handeln.

44.  centralna olympiada serbskeje rěče 2010

44. centralna olympiada serbskeje rěče wotmě so wot 26. do 28. meje 2010 w młodowni w Błótowskich Bórkowach. 63 šulerjow wubědźowachu so wo požadane certifikaty a myta. wjace ...

10-lětny jubilej w Slepom

Šulerjo Zakładneje šule Slepo zaběrachu so składnostnje 10-lětneho jubileja zawjedźenja dwurěčneho projekta 2plus na swojej šuli w projektowym tydźenju ze serbskimi bajemi. Z podpěru ... wjace ...

Intensiwny kurs čěšćiny

Wot 2. do 7. awgusta zarjaduje Rěčny centrum WITAJ w Chrósćicach intensiwny kurs čěšćiny za Serbow. Wuwučować budźe wšědnje šěsć hodźin Čech Pavel Šlechta. Po popołdnjach budu so přednoški w čěšćinje poskićować a po wječorach wšelake zabawy w čěskej rěči. Planowany je tež połdnjowski wulět do Čěskeje. Wšitcy zajimcy njech so přizjewja w Rěčnym centrumje WITAJ.

W Praze přednošowała

Sobudźěłaćerka RCW, Jadwiga Kaulfürstowa, je wutoru, 4. meje 2010, na Ekonomiskej wysokej šuli w Praze čěskim studentam kulturneho managementa wo aktualnym połoženju Serbow přednošowała. Při tym złožowaše so wosebje na serbskorěčne kubłanje w pěstowarnjach a šulach.

4. serbska čitanska nóc

Comicowe wubědźowanje w Hornjej Łužicy

Znowa kursy čěšćiny

Zakładny kurs serbšćiny za staršich

Nowe wudaće informaciskeho zešiwka Lutki wušło 

Šulerjo Serbskeho gymnazija Budyšin su po zymskich prózdninach do noweho internata zaćahnyli, kotryž je w nošerstwje Rěčneho centruma WITAJ.  

Wuske zhromadne dźěło z CSB

Naprašnik k wot W. v. Suchodoletza a S. Sachsy wuwiteho diagnostliskeho přepytowanja k zažnemu spóznaću dźěći z rěčnowuwićowym zapozdźenjom předleži nětko tež we woběmaj serbšćinomaj. Test SBE-2-KT, kotryž móža starši sami přewjesć, pomha ewentualne wuwićowe haćenja jich dwulětnych dźěći wotkryć, zo móhło so jim sčasom pomhać.

Rymowy memo 

Woblubowany dwurěčny dźěćacy spěwnik "Kikerahi, biło je tři" w dalšim nakładźe

Dobrowólne socialne lěto w kulturje - hač do do 31. měrca su požadanja móžne

Stipendije za kurs čěšćiny

Projekt wo Serbach na Kamjenskej šuli

Narodninski kalender k nowemu lětu

Nowe wudaće informaciskeho zešiwka Lutki wušoł 

Spočatk decembra je poslednje čisło Lutkow za 2009 wušło. Hłowna tema tutoho wudaća su serbske nałožki a wašnja w hodownym času a wokoło noweho lěta. Starši zhonja tójšto zajimaweho wo pěstowanju nałožkow we wšelakich regionach, na přikład wo Janšojskim bogu a wo dźěćetku. Dźěći namakaja nawod k zhotowjenju nowolětkow, bajkowe hódančko a baseń k nowolětnym přećam. Na wosebitych stronach za kubłarki poskića so rěč spěchowace hry, literarne pokiwy a wotputanska stawizna. wjace ...

Serbska online-hra na internetnych stronach Płomjenja

Nowa přistajena RCW: Šulska socialna dźěłaćerka na srjedźnymaj šulomaj

Wutworjenje dalšeje WITAJ-skupiny w Kulowskej pěstowarni