Rěcny centrum WITAJ w Budyšynje jo ze swójim wótźělenim wuwijanja rěcy/pedagogika jadnučka institucija w Górnej Łužycy, kótaraž wuwija wšykne górnoserbske wuceńske a wuknjeńske materialije za serbšćinu a za fachowu wucbu wót 1. do 12. lětnika w Sakskej.

Za wukniki/-ce w Bramborskej wudawa jogo wótźělenje w Chóśebuzu wjeliki źěl dolnoserbskich materialijow za lětniki 1 do 13.

Rěcny centrum WITAJ wudawa lětnje někak 30 knigłow a dalšnych wucbnych srědkow. To su w prědnem rěźe wucbnice, ale teke fachowe terminologije za wšykne wucbne pśedmjaty, słowniki, źěłowe zešywki, wuknjeńske cejdejki, źěłowe łopjena a didaktiske pśirucnicki. Pśi tom lektorki Rěcnego centruma wusko ze sobuźěłaśerjami Serbskego instituta w Budyšynje a Chóśebuzu, uniwersity w Lipsku, Źěłanišća za serbske kubłańske wuwijanje w Chóśebuzu kaž teke z fachowymi ceptarjami w šulach gromadu źěłaju.

Wósebne śěžyšćo na pólu wucbnicow su swójske wuwiśa. Zakład za to su płaśece wucbne plany. Zgromadnje z ceptarjami z prakse naźěłaju lektorki za górnoserbsku maminorěcnu wucbu w sakskich šulach trěbne maśeršćiny za kuždy lětnik a k tomu słušajuce cytanki a źěłowe zešywki. Swójske wuwiśa, w kótarychž se na Serby, jich wósebnosći a swójoraznosći glěda, pśedlaže teke za pśedmjata muzika a stawizny (tuchylu jano za górnoserbšćinu).

Mimo wucbnych materialijow za maminorěcnych górnoserbskich wuknjecych naźěłaju se w pedagogiskem wótźělenju Rěcnego centruma teke wucbnice a materialije za wuknjecych, kenž wuknu serbšćinu ako drugu rěc (pó koncepśe 2plus za górnoserbšćinu a pó koncepśe bilingualneje fachoweje wucby za dolnoserbšćinu) abo ako cuzu rěc.

Za serbskorěcnu fachowu wucbu pśełožuju w nadawku Rěcnego centruma WITAJ ceptarje z prakse licencne wudaśa nimskich nakładnistwow. Teke how jo wuske zgromadne źěło z rěcywědnikami górnoserbskeje a dolnoserbskeje rěcneje komisije a dalšnymi fachowymi kolegami njezbytne. Stawne dalejwuwiśe górnoserbskeje a dolnoserbskeje rěcy se pomina wobstawne twórjenje nowych fachowych zapśimjeśow. Nowa leksika se pó casu do fachowych terminologijow zaźěłajo. 

Dalšne źěłowe pólo wótrěda jo mjasecne wudaśe serbskeju źiśeceju casopisowu Płomjo a Płomje, kótarejž ceptarje rad ako wudopołnjecy material w serbšćinje wužywaju.

Mimo togo wuchada běrtyllětnje serbski pedagogiski casopis Serbska šula, kótaryž zagronita redaktorka pśigótujo a lektorizěrujo. W njom se tematizěrujo aktualne dwójorěcne kubłanje z wiźenja wědomnostnikow a ceptarjow z prakse na konkretnych pśikładach.