Rěcny marketing a projektowe źěło Rěcnego centruma WITAJ stej wusměrjonej na iniciěrowanje, wuwijanje a pśewjeźenje rěc spěchujucych napšawow. Pśi tom procujomy se wó zapśimjeśe wšyknych starstwowych kupkow.

W projektach z wólnocasnym charakterom dawamy serbski a nimski wótrosćecym źiśam a młodostnym móžnosć, serbšćinu teke zwenka familije a kubłanišća dožywiś a wósobinski nałožowaś.

Teke wuwijanje pśidatnych materialijow za wužywanje w šuli słuša k našym nadawkam. Mimo wucbnicow jo w šulach teke pótrjeba za wšakimi formami modernych medijow wjelika. Tak zgótujomy na pśikład słuchańske cejdejki a atlasowe kórty a wjerśimy abo synchronizěrujomy filmy za źíśi a młodostnych w serbšćinje.

Za źiśi w źiśowniskem starstwje zgótujomy swójski informaciski zešywk Lutki a materialije k pódpěrje pśiswójenja serbskeje rěcy kaž graśa, kólenkowe knigły, spiwniki a knigły z wulicowańkami.

Dalej jo naš zaměr, pódpěrowaś źěło wótkubłarkow pśez wuwijanje didaktiskich materialijow, kenž maju jim źěło pśi pósrědnjenju serbšćiny w źiśownjach a hortach wólažcyś. Teke naše dokubłańske pórucenja su na toś to źěło wótkubłarkow wusměrjone.