Zaměr: Ewaluacija ma zwěsćiś wobstojnosći, pód kótarymiž se źiśi w źiśownjach imersiwnje pó modelu WITAJ wótkubłuju. Wótpowědujucy wuslědkam pśedpołožyju se naraźenja k optiměrowanjeju modela WITAJ.

Pśedmjat: Ewaluacija póśěgujo se na pěś wuzwólone WITAJ-kupki w źiśownjach z howacej jadnorěcnje nimskimi kupkami.

Pśewjeźenje: Ewaluacija wótměwa se w šesć casowych interwalach. W nich wobglěduju se źiśi a wótkubłarki we wšednem mjazsobnem wobchaźe. Wuwiśe serbskorěcnych zamóžnosćow źiśi pśespytujo se z pomocu specializěrowanych testow. Z wótkubłarkami a nosarjami źiśownjow wjedu se wobšyrne interviewy k wótkubłanju pó modelu WITAJ. W formje napšašnikow gromaźe se měnjenja a naglědy starjejšych k wótkubłanju swójich źiśi. Wuslědki toś tych pśespytowanjow se analyzěruju a dokumentěruju.

Wuslědk: Nastaś ma analyza, kótaraž rozpomina mj. dr.

• familijowe wobstojnosći źiśi, kótarež se wobźěluju na projekśe WITAJ
• pśicyny starjejšych za rozsuźenje, swóje źiśi imersiwnje wótkubłaś daś
• notne wuměnjenja, kótarež nosarje twórje, aby źiśi se mógali w źiśowni serbski wótkubłaś
• wuměnjenja, pód kótarymiž wótkubłarki źiśam, ako wětšy źěl serbskorěcne pśedznajobnosći njamaju, serbšćinu zbližuju
• informěrowanosć starjejšych, nosarjow a wjednicow źiśownjow wó imersiwnem wótkubłanju
• wuwiśe rěcnych zamóžnosćow źiśi wob cas ewaluacije.