Dokulaž su WITAJ-wótkubłarki Dolneje Łužyce serbsku rěc akle w rěcnem kursu nawuknuli a wóna z tym njejo jich mamina rěc, su źěkowne za wjeleraku pomoc, kenž wót někotarych serbskich maminorěcnych dostawaju. Na zakłaźe spěchowanja ministarstwa za kubłanje, młoźinu a sport Bramborskeje pśewjeźo Rěcny centrum WITAJ wót apryla 2001 napšawu "Efektiwne pósrědnjenje serbskeje rěcy w źiśownjach".

 

W ramiku togo projekta woglědaju serbske maminorěcne a praktikarje/-ki pšawidłownje do WITAJ-kupkow. Wóni dawaju drogotne swójoraznosći swójeje rědkeje rěcy na źiśi a wótkubłarki dalej. Tak wulicuju źiśam bajki, z nimi graju, spiwaju, rymuju abo basle, pśi comž, se wě, pśecej serbski powědaju. Za źiśi jo wažne dožywiś, až teke wósoby zwenka źiśownje serbski powědaju. Maminorěcne wugbaju tež pśinosk k rěcnemu dalejkubłanju wótkubłarkow a pomagaju pśi wobźěłanju wót źiśownicow naźěłanych didaktiskich materialijow.