Pósrědnjenje serbskeje rěcy w šulach Lichego stata Sakska

 

Wótpowědujucy paragrafoju 2 Sakskeje šulskeje kazni pórucujo se na sakskich šulach w serbskem sedleńskem rumje serbska rěc
-          ako wucbna rěc (w statusu mamineje rěcy abo drugeje rěcy) a/abo
-          ako wucbny pśedmjat (w statusu cuzeje rěcy).
Na wšyknych sakskich šulach maju se pósrědniś zakładne znaśa wó stawiznach a kulturje Serbow.
 
W Sakskej wuwucujo se serbska rěc na 19 zakładnych šulach, 6 srjejźnych šulach a 3 gymnaziumach.
 
Serbšćina ako wucbna rěc
 
Nejwuspěšnjej serbska rěc se pósrědnja na šulach, kenž źěłaju pó koncepśe 2plus – šulske formy pśesegajuca dwójorěcna serbsko-nimska šula.
 
We wobłuku zakładneje šule jo se ze zachopjeńkom lětnika 2001/2002 na serbskich zakładnych šulach w Budyšynje, Chrosćicach, Pančicach-Kukowje, Radworje, Ralbicach a Worklecach zachopiło pó koncepśe 2plus źěłaś. Na zakładnyma šuloma w Slěpem a Wórjejcach jo ten koncept zakład za jadnotliwe kupki abo rědownje w kuždem lětniku. Na zakładnyma šuloma w Barće a Kulowje pśesajźaju se swójske šulske projekty k profilěrowanju a pśibliženju na koncept 2plus.
 

Pó koncepśe 2plus alfabetizěruju se wukniki w zakładnej šuli w zasaźe w maminej rěcy, pśi comž starjejše rozsuźuju, kótara rěc to jo. Alfabetizěrowanje w drugej rěcy se stawa paralelnje, tak až wukniki w głownem wobej alfabeśe do kóńca 1. lětnika nawuknu. W ramiku rěcneje wucby pódawa se w pśedmjatowem bloku ze serbšćinu, nimšćinu a wěcneju wědu maminorěcna wucba w serbšćinje abo nimšćinje w dwěma kupkoma. Konkretne rozdźělenje góźinow na serbšćinu a nimšćinu realizěrujo se w pedagogiskej zagronitosći šule. Wuknikam ze serbskimi maminorěcnymi zwiskami pódawaju se dalšne pśedmjaty w serbskej rěcy. Za wšykne druge wukniki jo wucba w toś tych pśedmjatach bilingualna.

 
We wobłuku srjejźneje šule a gymnaziuma źěłaju serbske srjejźne šule w Budyšynje, Radworje, Ralbicach a Worklecach kaž teke Serbski gymnazium Budyšyn pó toś tom koncepśe. 

Pó koncepśe 2plus se šulske žywjenje we wšyknych šulskich formach dominantnje serbske wugótujo, aby se wuknikam južo w kubłańskej instituciji samej pórucyli optimalne móžnosći nałožowanja serbskeje rěcy. Togodla se w šulach pśisamem jano serbski maminorěcny pedagogiski personal zasajźujo. Šule, kenž pó koncepśe 2plus źěłaju, su wšyknym źiśam pśistupne, kótarychž starjejše se wukubłanje w toś tej kubłańskej instituciji žyce a se z jeje zaměrami identificěruju.

 

Serbšćina ako wucbny pśedmjat

Na wšakorakich zakładnych a srjejźnych šulach kaž teke gymnaziumach w serbskem sedleńskem rumje Sakskeje se pórucujo serbšćina ako cuza rěc (glej kórta). 

Na šulach ze serbšćinu ako cuza rěc pódawa se w 1. lětniku tyźeński jadna góźina a w lětnikach 2 do 4 tyźeński tśi góźiny serbšćiny. 
Momentanje se koncepcija pśez Sakske kultusowe ministarstwo pód wědomnostnym pśewódom uniwersitowu Hamburg a Köln šesć lět ewaluěrujo.