Pósrědnjenje serbskeje rěcy w šulach kraja Bramborska

 

Serbšćina se pórucujo na 23 zakładnych šulach, jadnej cełkownej šuli, na Dolnoserbskem gymnaziumje a na jadnom centrumje wušego kubłanja. Formy pórucenja su:
  • fakultatiwna cuzorěcna wucba serbšćiny na zakładnych šulach, teke ako baza za dalšnu natwaŕ bilingualneje wucby
  • bilingualna fachowa wucba we wubranych wěcnych pśedmjatach na šesć zakładnych šulach w serbskem sedleńskem rumje w ramiku bilingualnego rěcnego programa WITAJ
  • obligatoriska cuzorěcna wucba serbšćiny na Dolnoserbskem gymnaziumje
  • dalejwjeźenje bilingualneje wucby resp. bilingualnych modulow we wubranych wěcnych pśedmjatach na Dolnoserbskem gymnaziumje
  • dalejwjeźenje obligatoriskeje cuzorěcneje wucby serbšćiny resp. bilingualnych modulow w jadnej rědowni wušeje šule
  • fakultatiwna cuzorěcna wucba serbšćiny na Centrumje wušego kubłanja I w Chóśebuzu
 
Kazniske zakłady

Wótpowědujucy paragrafoju 5 Bramborskeje šulskeje kazni maju wukniki/-ce pšawo, serbsku rěc nawuknuś a w pśedmjatach a lětnikach, kenž maju se póstajiś, wucbu w serbskej rěcy dostaś.

W šulach w sedleńskem rumje Serbow maju se stawizny a kultura Serbow do kubłańskego źěła zapśěgnuś a w šuli pósrědniś.

Dalšne kazniske zakłady a póstajenja:

  • zastojnstwowe pśedpise k zakładnošulskemu póstajenju – VV-GV § 7 wótr. 3 (4) 
  • zastojnstwowe pśedpise k sekundarnemu schójźeńkoju I – póstajenje VV-Sek I-V § 11, Sek I–V
  • bramborska kazń k wukubłanju wucabnikow § 4 wótstawk 2
  • ramikowe wucbne plany za cuze rěcy 1–10
  • póstajenje k šulskim kubłańskim nastupnosćam Serbow – SWSchV
Prědnotne gremije k pśesajźenju serbskeje kubłańskeje politiki:
  • Źěłowa kupka k rozwězanju relewantnych serbskich specifiskich kubłańskich temow pśi ministarstwje za kubłanje, młoźinu a sport
  • Serbska kubłańska seś
 
Pśispomnjeśa k pósrědnjenju serbskeje rěcy w šuli

Serbšćina se zasadnje pórucujo wót 1. lětnika pak ako zmakańska rěc pak w źěłowych kružkach abo ako cuzorěcna wucba.

Bilingualny rěcny program bazěrujo na WITAJ-koncepśe k pśiswójenju rěcy, kótaryž pśedwiźi fachowu wucbu we wěcnem pśedmjaśe wót 1. lětnika we wuknjeńskich kupkach a nic w rědowni.

W Bramborskej se bilingualny rěcny program pśesajźujo w zakładnych šulach z fleksibelneju zachopneju fazu (fleks) kaž teke bźez takeje.

Primarny schójźeńk w Bramborskej w zasaźe se kóńcy pó 6. lětniku. Na Dolnoserbskem gymnaziumje pak jo za źiśi z wjelgin dobrymi wugbaśami móžnosć, pó 5. lětniku se pśewześ do wugbaśoweje rědownje wósebnje wobdarjonych. W takej rědowni se tejerownosći bilingualnje wuwucujo.

Mimo nawuknjenja serbskeje rěcy w šuli dajo relatiwnje wobšyrne zwenkašulske aktiwity w serbskej rěcy (glej mjazy drugim: Projekty Rěcnego centruma WITAJ).

Ramikowe wucbne plany za rěcy su teke za pósrědnjenje serbskeje rěcy zawězujuce (glej: Barlinsko-Bramborski kubłański serwer).