Intensiwny rěcny kurs Rěcnego centruma Chóśebuz jo myslony za wukubłane wótkubłarki, kenž kśě se notne rěcne a metodiske zamóžnosći za źěło we wobłuku WITAJ-projekta pśiswójś. Notne take rěcne wukubłanje jo, dokulaž maminorěcne dolnoserbske wótkubłarki wěcej njamamy. Wótkubłarki se w kursu wuzamóžnjaju, z pomocu metody imersije k pśiswójenju serbskeje rěcy we WITAJ-kupkach w źiśownjach a hortach Dolneje Łužyce pśinosowaś.

 

Kursistki su za wětšy źěl delegěrowane wót nosarjow źiśownjow a hortow Dolneje Łužyce, kenž kśě WITAJ-projekt w swójich institucijach zawjasć abo rozšyriś.

 

Intensiwny rěcny kurs trajo 7 do 8 mjasecow a jo koncipěrowany za zachopjeńkarje, to groni, až njejsu žedne pśedznaśa w serbskej rěcy trěbne. W głownem ma kurs tśi źěle: fonetiski, gramatiski a tematiski. Wušej togo wopśimjejo kurs hyšći slědujuce komponenty: hospitaciju, praktikum, didaktisku wucbu a informacije wó kulturje a stawiznach Serbow.

 

W 9 doněntejšnych kursach jo se dogromady 52 wótkubłarkow wukubłało. Z nich jo źinsa 34 direktnje we WITAJ-projekśe aktiwnych. X. intensiwny kurs jo zaplanowany wót 2010.