Projekty w Górnej Łužycy

 

Pórucenja za źiśi w starstwje wót 2 do 7 lět
 
Dwójcy wob lěto zmakaju se wšykne zajmowane familije, kótarychž źiśi se na WITAJ-projekśe wobźěluju abo dwójorěcne wótrostuju, k zgromadnym aktiwitam a wuměnje nazgónjenjow.
 
Znaty pupkowy grajaŕ Měrćin Krawc jo serbskorěcne graśa w źiśownjach a zakładnych šulach pśedstajał. Pśidatnje jo nastała DVD.

 

Pórucenja za wuknjecych lětnikow 1 do 4
  
W zgromadnem źěle z Nimsko-serbskim ludowym źiwadłom wugótujo Rěcny centrum WITAJ za wuknjecych 3. a 4. lětnika lětnje cytańsku noc w Budyšyńskem Źiwadle na Groźe. Mimo togo až se wopóznawaju z wjele rědnymi knigłami, wuknjece teke dožywjaju krotke literarne kuse na jawišću.
 
"Knigły su zastupna kórtka do raja fantazije", tak se pomjenijo napominanje k wuběźowanju w cytanju za wuknjecych 3. lětnika serbskich zakładnych šulow a zakładnych šulow, kenž pó koncepśe 2plus źěłaju. Wšykne wuknjece su napominane, se aktiwnje ze serbskeju źiśeceju literaturu zaběraś.
 
Wuknjece dwójorěcnych rědownjow z pśedewšym nimskego wobswěta pśežywjaju gromaźe ze serbskimi źiśimi tyźeń nazymskich prozninow. Pśi zgromadnem graśu a zgromadnych pśedewześach se mjazy sobu zeznawaju, nałožuju swóje rěcne znaśa a na taki part rozšyrjaju swój słowoskład.
 
Dwójorěcny prewentiwny projekt pórucujo Rěcny centrum WITAJ gromaźe ze Seśu za źiśece a młoźinske źěło Biskupicy zakładnym šulam a hortam. Źiśi se rozestajaju z temoma "Rěc śěła" a "Kurjenje a dychańske organy".
 
Stwórtkarje, kenž w šuli serbsku rěc ako cuzu rěc wuknu, pśepšosujo Rěcny centrum WITAJ slědnu septembersku srjodu do Radworskeje zakładneje šule, aby se w małych, měšanych kupkach na wšakorakich stacijach ze serbskeju rěcu a kulturu zaběrali.
 
Wót lěta 2001 organizěrujo a pśewjedujo Rěcny centrum WITAJ w ramiku Mjazynarodnego folklornego festiwala Łužyca źiśecy program ze zaměrom, zajm źiśi za serbsku kulturu a rěc zbuźiś.

 

Pórucenja za wuknjecych lětnikow 5 do 10
 
Nejlěpše wukniki/-ce 6. lětnika z Górneje a Dolneje Łužyce wobźěluju se na tśidnjownej serbskej olympiaźe. W někotarych gódnośeńskich kupkach dopołnjuju wustne a pisne nadawki. Fachowe ceptarje/-ki wuslědki pósuźuju.
 
Wšykne wuknjece mjazy 10 a 18 lětami se kužde druge lěto napominaju, na comicowem wuběźowanju se wobźěliś. Pśi tom se pózbuźuju, swójim kreslankam serbske teksty pśidaś.
 
Wuknjece z Górneje a Dolneje Łužyce źěłaju dwa dnja gromaźe ze źiwadłownikami/-cami Nimsko-serbskego ludowego źiwadła we wšakorakich workshopach. Pśi tom se intensiwnje ze serbskeju rěcu na jawišću zaběraju.
 
W ramiku Mjazynarodnego filmowego festiwala Rěcny centrum pśepšosujo wuknjecych na woglěd festiwala do Kamjenice. Wubrane filmy festiwala se pózdźej w zgromadnem źěle ze SAEK serbski synchronizěruju.
 
Kužde lěto zasej redakcija źiśecego casopisa Płomjo napominajo serbske wukniki/-ce 5. do 8. lětnika serbskich srjejźnych šulow a Serbskego gymnaziuma, se wobźěliś na štaflowem běgu. Wóno se wótměwa kužde lěto w oktobrje na Ralbicańskem sportnišću. Gólcowe resp. źowćowe štaflowe mustwo wobstoj pśecej z jadnogo wuknika/jadneje wuknice wótpowědnego lětnika. Dobyśarske mustwo smějo pokal Płomjenja na jadno lěto sobu domoj wześ.  

 

Pórucenja za wuknjecych lětnikowu 11 a 12
 
Žywjenje w internaśe wuknikam/-cam zmóžnja, se aktiwnje na duchno-kulturnem žywjenju města Budyšyn wobźěliś a wšykne towarišnostne a kulturne pórucenja serbskich a dalšnych institucijow wužywaś. Pśez zgromadne bydlenje jo jim pak teke móžno, serbske kulturne wjeraški sami wugótowaś, serbske nałogi a kulturu woplěwaś a na taki part internat ako platformu zarědowanjow za towarišnostne žywjenje wužywaś.

 

Pórucenja za wšykne starstwowe kupki
 
 
Serbskorěcne projekty na šulach se pó pótrjebje pó wopśimjeśu, organizatoriski a personelnje pódpěruju. K dopołnjenju toś tych nadawkow wuźaržujo Rěcny centrum WITAJ kontakty ku kubłanišćam, serbskim institucijam, studentam/-kam a młodostnym.
 
Sobuźěłaśerje/-ki Rěcnego centruma WITAJ wótpowědujucy starstwoju wuknjecych swóje źěłowe póla pśedstajaju. W formje małego projektowego źěła źiśi nazgóniju, kak na pśikład nastawa wucbnica abo źiśecy casopis Płomjo/Płomje.