WITAJ-camp jo koncipěrowany za wukniki/-ce w starstwje wót 8 do 13 lět, ako se na WITAJ-projekśe wobźěluju. Až doněnta njejo dało dosć rěc spěchujucych pórucenjow. Zaměr jo, wšednje se ze źiśimi serbski rozgranjaś. Pó móžnosći pśigótujomy teke projekty, ako źiwadłowu źěłarnju a muzikowe wjacory w serbskej rěcy. Pó styrich wuspěšnych campach móžomy wěste byś, až jo se toś ta forma zaběry w lichem casu etablěrowała.

 

 

Witaj-Camp 2011

29 wuknikow a wuknicow ze šulow z WITAJ-projektom w Dolnej Łužycy jo wót 03.07. – 08.07.2011 we wózowem groźe we Wjelikich Drjejcach dožywjenja połny prozninski tyźeń dožywiło. Pódla kólasowanjow, jĕzby na kulturnu kupu Einsiedel, jĕzby z pławom, jĕzby z dłujkim drjewowym wózom a kreatiwnych zabĕrow  su wukniki a wuknice wšykne zaśišće wó dožywjenjach zezbĕrali za swójski campowy casnik „Stary wósoł“. Na pšašanje, co jo to nejlĕpše w campje było, su źiśi wótegronili: kupanje. Nĕkotare impresije z WITAJ-campa pórucyju fota wót wšakich aktiwitow togo tyźenja.