Specifiske pórucenja k šulskim swěźenjam a projektowym dnjam

 

Pórucenje płaśi za wšykne šule, kenž se za serbske projekty zajmuju. Wósebnje k projektowym dnjam w šulach abo k šulskim swěźenjam pórucujomy pó wótgłosowanju ze sobuźěłaśerjami/-kami Rěcnego centruma WITAJ jadnotliwe, wósebnje pśigótowane module.
Móžno jo, take zarědowanja z drugimi partnarjami/-kami, ako na pśikład z wokrejsom Sprjewja Nysa, Ludoweju wusokeju šulu wokrejsa Sprjewja Nysa abo Serbskeju kulturneju informaciju LODKA pśewjasć.
 
 
Pśikłady za projekty (te mógu se hyšći pśewjasć)
 
Pówěsćowy pśestrěńc 
W zgromadnem źěle wokrejsa Sprjewja Nysa, Ludoweje wusokeje šule wokrejsa Sprjewja Nysa a Rěcnego centruma WITAJ su wukniki/-ce powěsćowy pśestrěńc naźěłali, kenž su pótom institucije ako drogowańsku wustajeńcu wupóžycyś a wustajiś mógali. W fazy nastawanja su se wukniki/-ce z wobsedlenim Łužyce pśez Słowjanow a z nastawanim pówesćow zaběrali a su musali rěcny kwiz wó powěsćach wugódaś. Ako wjerašk su źiśi nejlubše powěsćowe figury nakreslili. Jadnotliwe źěła smy zjadnośili k wjelikemu pśestrěńcoju. 
 
Kwiz w tśich rěcach
W zgromadnem projekśe z nimskimi a pólskimi wuknikami/-cami su źiśi musali rěcny kwiz (nimski, pólski a serbski) wugódaś. Zaměr jo był, móstowu funkciju dolnoserbskeje rěcy wuźěłaś. Wósebne pólske źiśi a serbšćinarje su wužytk dwójorěcnosći wužywaś mógali. Pótom su w kreatiwnej źěłarni pówěsćowe póstawy w formje jadnorych marionetow nastali.
 
Programy abo programowe module w serbskej rěcy
 
Graśe regionow 
Na zakłaźe južo eksistěrujucego graśa wuźěłaju wukniki/-ce Picańskego amta graśe regionow w styrich rěcach. Z pomocu togo graśa kśě wukniki/ce wukrajnym partnarjam/-kam w Pólskej a w Nižozemskej swóju domownju pśedstajiś. Nawopak pśedstajiju nižozemske a pólske źiśi swóju domownju. Graśe jo tak koncipěrowane, až móžo se rozšyriś. Projekt jo w fazy wuźěłanja. Dogótowanje smy za lěto 2010 zaplanowali.
 
Jatšy pla Serbow 
K jatšam pórucujomy pśednoski wó jatšownych nałogach, zwězane z praktiskimi źěłami. Gromaźe z kuratorami Serbskego muzeja Chóśebuz a ze šulu pśedstajamy jatšowne nałogi, ako wóskowanje jatšownych jajow, jatšowne spiwanje, walkowanje, jatšowny wogeń, jatšowne rejtowanje a hyś pó jatšownu wódu.
 
Kwiz a wustajeńca k WITAJ-projektoju
Pórucujomy k šulskim swěźenjam kwiz w serbskej rěcy abo kwiz wó Serbach ze swójimi nałogami a tradicijami. Pórucujomy informaciski material wó Serbach.