Wót lěta 2004 pśewjeźo Rěcny centrum WITAJ Chóśebuz dolnoserbske comicowe wuběźowanje. Na njom  jo se až doněnta 104 wuknikow/-cow wobźěliło. Tema jo licho wuzwólona, tak až nic njestoj pśeśiwo kreatiwnosći młodych wuměłcow/-cowkow. Nastawaju krotke tšojeńka wó serbskich powěsćowych póstawach a nałogach, na pś. wó pśezpołdnicy, wužowem kralu a wódnem mužu, lutkach, wó jatšownem wognju, ale teke tšojeńka wó zwěrjetach, dožywjenjach w prozninach a zwenkazemskem. Jury z tśich wósobow pógódnośujo comici pód aspektami nałožowanja dolnoserbskeje rěcy, ideje a kreslarskego wugótowanja. Nejlěpše pśinoski z wuběźowanjow w lětach 2004 do 2006 su se zestajili w comicowem zešywku, kótaryž stoj k dispoziciji za šule ze serbskeju resp. z bilingualneju wucbu.